Daxili siyasət

Ana səhifə

Daxili siyasət

Vahid Ərdəm: “Azərbaycanın məruz qaldığı haqsızlığa qarşı mübarizəmizi nəticə əldə edənə qədər davam etdirəcəyik”

14 avqust 2007 10:55 (UTC +04:00)

- Böyük dövlət idarəçiliyi təcrübənizə siyasi və beynəlxalq aləmdə iş təcrübəniz də əlavə olunub. Türkiyədəki düşüncə və media qurumları sizi müdafiə naziri vəzifəsində görmək istədiklərini gizlətmirlər. Bununla bağlı baş nazir tərəfindən sizə hər hansı işarə gəlibmi?

- Mənə hər hansı məlumat gəlməyib. Nazirlər Kabinetini baş nazir müəyyənləşdirir. O, yaxın əməkdaşlıq şəraitində işləyə biləcəyi adamları kabinəyə daxil edir. Hazırda kiminsə nə isə bildiyini zənn etmirəm. Çünki hamı prezident seçkisi ilə məşğuldur. Ancaq baş nazirin yeni kabinetin formalaşdırılması üzərində çalışdığını da bilirəm.

- Beynəlxalq arenada Türkiyəyə qarşı haqsız hücumlara sinə gərdiniz, İrəvanda Azərbaycan torpaqlarının işğaldan azad edilməsinin qaçılmaz olduğunu Ermənistan parlament sədrinin üzünə çırpdınız. AKP hökumətinin Ermənistana qarşı siyasətinin bundan sonra daha sərt olacağını söyləyə bilərikmi?

- Mən hər zaman hər yerdə haqsızlıqlara qarşı çıxıram. Türkiyənin qardaşı olan Azərbaycanın məruz qaldığı haqsızlığa qarşı mübarizəmizi nəticə əldə edənə qədər davam etdirəcəyik. Biz Azərbaycanı öz dövlətimiz kimi görürük. Ona görə də Azərbaycanın problemi Türkiyənin problemidir. Ermənistanın işğalına qarşı Azərbaycanla birlikdə mübarizə aparacaq və haqsızlığın aradan qaldırılmasına nail olacağıq. Bunun başqa yolu yoxdur. Hamı bilir ki, Ermənistanın XXI əsrdə Azərbaycan torpaqlarını işğal altında saxlaması qəbul edilə bilməz. Biz Ermənistanla düşmən olmaq istəmərik. Ancaq ilk növbədə Ermənistan Türkiyə ilə yaxşı münasibətlər yaratmalı və beynəlxalq aləmdə Türkiyəni haqsız yerə suçlamaqdan vaz keçməlidir. Ermənistan bir an əvvəl Azərbaycan torpaqlarından çəkilməlidir. Əgər bunu edərsə, bizimlə də, Azərbaycanla da münasibət yarada bilər. Ermənistan Azərbaycan və Türkiyə ilə barışmasa, bölgədə qapalı qutu kimi qalmağa məhkumdur.

- Bu yaxınlarda Ermənistanın baş naziri Serj Sarkisyan Türkiyə-Ermənistan sərhədlərinin açılması üçün NATO-nun Ankaraya təzyiq göstərməməsini tənqid etdi.

- NATO-nun sülhə nail olmaq üçün ilk növbədə Ermənistana təzyiq göstərməsi lazımdır. Əvvəlcə əsas problemi həll etməliyik ki, sonra təfərrüatlara keçək. Təzyiq göstəriləcək yeganə məsələ Ermənistanın öz sərhədlərinə çəkilməsidir.

- Türkiyəni çox narahat edən PKK terroruna qarşı mübarizədə vəziyyət necədir?

- O məsələdə də əvvəl-axır Türkiyə başarılı olacaq. Çünki biz son dərəcə güclüyük. Ancaq biz beynəlxalq problemlər də yaratmaq istəmirik. Məsələnin beynəlxalq konsensus yolu ilə həll edilməsini istəyirik. İraq baş nazirinin PKK-nı terrorçu teşkilat elan etməsinden məmnuniyyət duyduq. ABŞ, Türkiyə və İraq arasında terrora qarşı mübarizədə üçtərəfli mexanizm işləyir. Prezident seçilib yeni hökumət qurulan kimi, biz bu işlərlə ciddi şəkildə məşğul olacağıq. Əvvəl-axır bu məsələni həll edəcəyik. Yəni Şimali İraqda bəzi kürd ünsürləri müəyyən bəyanatlar versələr də, ABŞ-Türkiyə-İraq üçtərəfli mexanizminin təzyiqinə davam gətirə bilməyəcəklər. /APA/