Daxili siyasət

Ana səhifə

Daxili siyasət

Ana Vətən Partiyası qurultay keçirib - FOTO

Ana Vətən Partiyası qurultay keçirib - <span style="color: red;">FOTO

03 avqust 2013 10:02 (UTC +04:00)

Bakı. Ramil Məmmədli – APA. Ana Vətən Partiyasının (AVP) VI qurultayı keçirilib.

APA-nın məlumatına görə, qurultayda yığıncağın katibliyi və digər komissiyaları seçilib, qurultayın gündəliyi təsdiqlənib.

Partiyanın hesabatını AVP sədri Fəzail Ağamalı təqdim edib. O çıxışında sədr olduğu müddətdə görülən işlərdən danışıb, o cümlədən partiyanın baş verən proseslərə münasibətini açıqlayıb. F. Ağamalı partiya üzvlərini vətəndaşlıq mövqeyinə dəvət edərək, Azərbaycan dövlətçiliyinin hər şeydən önəmli olduğunu vurğulayıb.

İqtidarın fəaliyyətini təhlil edən F. Ağamalı prezident İlham Əliyevin xarici siyasətini təqdir edib. O bildirib ki, bu gün Rusiya Azərbaycanı Avrasiya İttifaqına cəlb etməklə, ölkəni modern SSRİ-yə üzv etmək istəyir: “Biz Azərbaycanda o şəxsin hakimiyyətdə olmasının tərəfdarıyıq ki, o, Azərbaycana həqiqi mənada töhfə verir, dünya səviyyəsində tanınan güclü şəxsiyyətdir”.

F. Ağamalı qeyd edib ki, xarici qüvvələrə arxalanan rejissor Rüstəm İbrahimbəyov və digər şəxslərin hakimiyyətə gəlməsi yolverilməzdir.

F. Ağamalı Azərbaycan torpaqlarının işğaldan azad olunmasının yolunun hərbi əməliyyatlardan keçdiyini də çıxışında vurğulayıb.

Çıxışlardan sonra AVP qarşıdan gələn prezident seçkilərində partiyanın mövqeyini müəyyənləşdirib və qərara alınıb ki, AVP oktyabrın 9-da keçiriləcək prezident seçkilərində hazırkı dövlət başçısı İlham Əliyevin namizədliyini dəstəkləsin.

Yığıncaqda AVP-nin Nizamnaməsinə əlavə və dəyişikliklər edilib, yeni proqram təsdiq edilib.

Təşkilatı məsələlər hissəsində Fəzail Ağamalı növbəti müddətə AVP sədri seçilib.

Qurultayda tarixi Azərbaycan torpaqları olan indiki Ermənistan ərazisinin geri qaytarılması və Güney Azərbaycanda olan vəziyyətlə bağlı bəyanatlar qəbul olunub.

Toplantıda prezident seçkiləri ilə bağlı Azərbaycan xalqına müraciət də qəbul olunub. Müraciətdə bildirilir ki, İlham Əliyevin yenidən prezident seçilməsi ilə qarşıda duran bir sıra milli problemlərin həllinə nail olunacaq: “Bu uğurlu yolda birinci addım düzgün seçim etməkdir. Əziz soydaşlar, bir daha Sizi gələcək uğurlarımızın qarantı, vətəninin gələcəyini düşünən İlham Əliyevə səs verməyə çağırırıq”.

Sonda AVP sədri Fəzail Ağamalı Partiyanın bundan sonrakı fəaliyyət istiqamətləri haqqında çıxış edib.