Diaspor

Ana səhifə

Diaspor

Türkiyə-Ermənistan sərhədindəki Əlican kəndində ermənilər tərəfindən qətlə yetirilmiş Azərbaycan türklərinin anım mərasimi keçirilib - YENİLƏNİB - FOTOSESSİYA

Türkiyə-Ermənistan sərhədindəki Əlican kəndində ermənilər tərəfindən qətlə yetirilmiş Azərbaycan türklərinin anım mərasimi keçirilib - <font color=red>YENİLƏNİB - FOTOSESSİYA</font>

22 aprel 2009 12:56 (UTC +04:00)

İğdır. Vüqar Məsimoğlu - APA. Bu gün Türkiyə-Ermənistan sərhədinin 1 kilometrliyində, İğdırın Əlican kəndində “1915-1918-ci illərdə İğdırda erməni daşnak komitələri tərəfindən qətlə yetirilmiş Azərbaycan türklərinin anım mərasimi” keçirilib. APA-nın Türkiyəyə ezam olunmuş əməkdaşının məlumatına görə, Əlican sərhəd-keçid məntəqəsi yaxınlığındakı ərazidə keçirilən mərasimə İğdırın müxtəlif yerlərindən beş minə yaxın insan qatılıb. Mərasimin təşkilatçıları Türkiyədə fəaliyyət göstərən İrəvan Türkləri Dayanışma Dərnəyi, Əsilsiz erməni soyqırımı iddialarına qarşı Mücadilə Dərnəyi və Azərbaycanda fəaliyyət göstərən Beynəlxalq Diaspor Mərkəzidir. Mərasimə Azərbaycandan da elm adamları və media mənsublarından ibarət nümayəndə heyəti qatılıb. Nümayəndə heyətinə Beynəlxalq Diaspor Mərkəzinin rəhbəri İsmayıl Ağayev, professor Vaqif Arzumanlı, erməni məsələsini araşdıran müxtəlif elm adamları daxildir.

Mitinqdə İğdırda yaşayan Axısxa türkləri də iştirak ediblər. Aksiya Türkiyənin İstiqlal marşı və Azərbaycanın dövlət himninin səslənməsi ilə başlayıb.

Tədbiri Əsilsiz erməni soyqırımı iddialarına qarşı Mücadilə Dərnəyinin rəhbəri Göksel Gürbey açıb. O deyib ki, ermənilər 1915-1918-ci illərdə Anadolunun ən müxtəlif bölgələrində soyqırımı törədiblər: “Onların ən çox soyqırımı törətdiyi yerlərdən biri də İğdırdır. Burada 16 toplu məzarlıq aşkarlanıb. Onlardan Oba, Haqmehmet, Gədikli və Daşburunda toplu məzarlıqlar açılıb, soyqırımının törədildiyi isbatlanıb”.

Türkiyə-Ermənistan sərhədlərinin açılması barədə məlumatların Azərbaycanda haqlı narahatlıq yaratdığını bildirən G. Gürbey Azərbaycan türklərini rahat olmağa çağırıb: “Qarabağ işğaldan azad olunmayana kimi sərhədlər açılmayacaq. Biz Oba, Haqmehmet, Xocalı soyqırımlarını unutmadıq, heç kim də unuda bilməz”.

Azərbaycanlıların Dayanışma Dərnəyinin başqanı Timur Səlcuq isə çıxışında İğdır-Sürməli qəzasının ən böyük soyqırımı faktlarına şahidlik etdiyini deyib: “Ermənilər hər il aprelin 24-də qondarma soyqırımı ilə bağlı iddiaları parlamentlərin gündəminə gətirirlər. Sanki onlar bizə deyil, biz onlara qarşı soyqırımı törətmişik. Buna səbəb gerçəkləri dünya ictimaiyyətinə çatdıra bilməməyimizdir. Biz səhvlərdən nəticə çıxararaq yolumuza davam etməliyik”.

T. Səlcuq onu da deyib ki, İğdırda keçirilən bələdiyyə seçkilərinin nəticələri çox acı olub: “İnsanlarımız bir-biri ilə üz-üzə gəlib”.

Azərbaycanda fəaliyyət göstərən Beynəlxalq Diaspor Mərkəzinin rəhbəri İsmayıl Ağayev deyib ki, erməniləri onların öz xisləti məhv edəcək: “Hər səhər gözlərini açıb gördükləri bu Ağrıdağ, türk bayraqları onlara zərbədir. Ermənilərin soyqırımı iddialarının cavabını İğdır camaatı bu qoşalaşmış bayraqlarla verir. Ermənilər tarixdə bir daha türklərə qarşı soyqırımı törədə bilməyəcəklər”.

Professor Vaqif Arzumanlı isə çıxışında Türkiyənin çoxsaylı vilayətləri arasında İğdırın Azərbaycan üçün ayrıca yerinin olduğunu vurğulayıb: “Türklərin bir milyon yarım ermənini öldürdüyünü iddia edənlər dünya ictimaiyyətini aldada bilərlər. Amma elm adamlarını aldatmaq olmaz. Biz əksinə, ermənilərin türklərə qarşı soyqırımı törətdiklərini isbatlayıb bütün dünyaya çatdırmalıyıq”.
Qaraqoyunlu bələdiyyə başqanı Ziyadəli Dəlikdaş isə deyib ki, Türkiyə Ermənistan sərhədlərinin açılması ilə bağlı təkbaşına qərar verə bilməz: “Ermənistan işğalı aradan qaldırmayanadək sərhədlər açılmayacaq. Sərhədlərin açılması ABŞ və Avropa Bitliyini sevindirər, bizləri isə üzər”.

İrəvan Türkiləri Dayanışma Dərnəyinin sədri Nurəddin Aras da hər il aprelin 24-də ermənilərin hay-küy qaldıraraq Türkiyəni beynəlxalq ictimaiyyət qarşısında pis vəziyyət qoymağa çalışdıqlarını xatırladaraq bildirib ki, buna qarşılıq olaraq səsimizi daha möhkəm çıxarmalıyıq: “Osmanlı imperiyası yeddi dövlətə qarşı döyüşərkən, üç qitədə yerləşən torpaqlarını itirərkən ermənilər fürsətdən istifadə edib baş qaldırdılar. Osmanlı dövləti “Mənə qarşı qalx, mən sənə heç nə etməyim” deyə biləcək bir dövlət deyildi. Bu səbəbdən ermənilərin sürgün olunmasına qərar verildi. Bu qərar vaxtında qəbul edilmiş qərar idi. Sürgün zamanı ermənilərin bir qismi pis hava şəraitindən və xəstəlikdən ölüb. Amma onlara qarşı soyqırımı törədilməyib. Biz tariximizlə hər zaman üz-üzə gəlməyə hazırıq. Ermənistan soyqırımı törədildiyini iddia edirsə, İrəvandakı, Moskvadakı arxivləri açsın. Açmırsa, o zaman sussun”.

Mitinq Azərbaycan-Türkiyə dostluğunu tərənnüm edən mahnıların oxunması ilə başa çatıb.