Digər xəbərlər

Ana səhifə

Digər xəbərlər

Ombudsman Ermənistanın Azərbaycana qarşı təcavüzünün 20 illiyi ilə əlaqədar müraciət edib

29 aprel 2008 13:13 (UTC +04:00)

APA-nın məlumatına görə, E. Süleymanova keçirdiyi brifinqdə bildirib ki, Ermənistan 1988-ci ildən etibarən Azərbaycana qarşı hərbi təcavüzə başlayıb. Ermənistanda “Azərbaycanlılarsız Ermənistan” şüarı altında həyata keçirilən etnik təmizləmə siyasəti nəticəsində 200 mindən çox azərbaycanlı doğma yurdundan zorla deportasiya edilib, 200-dən çox soydaşımız xüsusi qəddarlıqla qətlə yetirilib. O, Ermənistanın yalan və əsassız iddialarla beynəlxalq ictimaiyyəti aldatdığını söyləyib. E. Süleymanova deyib ki, ermənilər mayın 2-də ABŞ-ın Los-Anceles şəhərində Ermənistan Mədəniyyət Fondunun dəstəyi ilə “Azad Artsaxın 20 illiyinin qeyd olunması” mövzusunda tədbir keçirəcəklər: “Bu, beynəlxalq hüquq normalarına ziddir. Ermənistan və onu dəstəkləyənlər bu addımı atmaqla Dağlıq Qarabağ münaqişəsinin sülh yolu ilə tənzimlənməsində qeyri-konstruktiv mövqedə olduqlarını nümayiş etdirir”. Ombudsman Azərbaycanın aidiyyəti dövlət qurumlarını, ictimai təşkilatları, Azərbaycan diasporunu Ermənistanın uydurma iddialarına qarşı birgə təbliğat kampaniyasına başlamağa çağırıb. E. Süleymanova qondarma “Dağlıq Qarabağ Respublikası”nda Ombudsman Aparatının yaradılması ilə bağlı məsələyə də münasibət bildirib: “Ermənilər bu addımları ilə beynəlxalq normativ aktlara qarşı sayğısızlıqlarını nümayiş etdirirlər”. E. Süleymanovanın məsələ ilə bağlı beynəlxalq təşkilatlara ünvanladığı müraciətdə isə dünya birliyi erməni təbliğatına uymamağa çağırılıb.