Bakı. Şəhriyar Əlizadə - APA. Bu gün Ali Məhkəmədə “Qarabağ partizanı” kimi tanınan və 2004-cü ildə Ağır Cinayətlər Məhkəməsinin hökmü ilə ömürlük azadlıqdan məhrum edilən Məmməd Məmmədovun kassasiya şikayəti əsasında məhkəmə prosesi başa çatıb.
Vəkil Əsabəli Mustafayevin APA-ya verdiyi məlumata görə, məhkəmə kassasiya şikayətini təmin etməyib.
Qeyd edək ki, Məmməd Məmmədov 2004-cü ildə Ağır Cinayətlərə Dair İşlər üzrə Məhkəmənin qərarı ilə ömürlük azadlıqdan məhrum edilib. “Qarabağ partizanları”nın işini Milli Təhlükəsizlik Nazirliyi araşdırıb.
“Qarabağ partizanları” xüsusi dəstəsi yaradaraq silah əldə ediblər və döyüşmək üçün Qarabağa getmək istədiklərini bəyan ediblər. MTN-in keçirdiyi əməliyyat zamanı onlar həbs edilib. Əməliyyatın keçirildiyi Xətai parkında atışma olub. Atışma zamanı bir nəfər ölüb, bir nəfər yaralanıb. Həmin şəxsləri tutublar. Amma Məmməd Məmmədovun işinə ayrıca baxılıb. Çünki həmin qətldə onu günahlandırıblar. Sonradan dəstənin digər üzvlərinin üzərindən mütəşəkkil dəstə yaratmaq ittihamı götürülüb. Yalnız Məmməd Məmmədovun işində bu ittiham saxlanıb.
Avropa İnsan Hüquqları Məhkəməsi Məmməd Məmmədovun şikayətinə baxıb və bununla bağlı qərar verib. Avropa Məhkəməsi hesab edib ki, Ali Məhkəmə Məmməd Məmmədovun işinə baxarkən qanun pozuntusuna yol verib. Çünki prosesdə nə Məmməd Məmmədov, nə də vəkili iştirak edib. Bundan sonra Ali Məhkəmə Məmməd Məmmədovun işinin Bakı Apelyasiya Məhkəməsinə qaytarılmasına və yenidən baxılmasına qərar verib. Ötən il Bakı Apellyasiya Məhkəməsində M. Məmmədovun işinə yenidən baxılsa da, hökm dəyişdirilmədən saxlanılıb. Kassasiya şikayəti həmin qərardan verilib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
