Döyüş növləri

Ana səhifə

Döyüş növləri

Azərbaycan cüdoçuları Ermənistanda keçirilən Avropa çempionatının ilk günündə 1 gümüş, 2 bürünc medal qazanıb

11 sentyabr 2009 14:49 (UTC +04:00)

Bakı – APA. Bu gün Ermənistanın paytaxtı İrəvanda gənc cüdoçular arasında Avropa çempionatı start götürüb. Apasport.az saytının məlumatına görə, birinciliyə Azərbaycanın 5 idmançısı da qatılıb. Yarışın ilk günü 3 həmvətənimiz qüvvəsini sınayır.

55 kq çəkidə mübarizə aparan İlqar Müşkiyev mübarizəyə ikinci mərhələdən başlayıb. Finaladək irəliləyən idmançımız qızıl medal uğrunda görüşdə rusiyalı Viktor Aşinadzeyə uduzaraq, gümüş medalla kifayətlənib.

60 kq çəki dərəcəsində Rasim Əsədullayev yarımfinalda uduzduğundan təsəlliverici görüşlərə qatılıb. Burada italiyalı Amedo Assorsi üzərində qələbə qazanan həmyerlimiz bürünc medala sahib çıxıb.

Digər cüdoçumuz Fəqan Eminoğlu (66 kq) debütdə uğur qazanıb. O, estoniyalı Evert Roopsonu məğlub edib. Ardından Çedrik Bessi (Çernoqoriya) və Zsolt Qorjanatsı (Macarıstan) üstələyərək, yarımfinala adlayıb. Eminoğlu finala vəsiqə uğrunda ukraynalı Artyom Bulıqa ilə üz-üzə gəlib. Amma idmançımız bu dəfə uğursuzluq yaşayıb. O, rəqibinə vazari xalı ilə uduzaraq, qızıl medaldan əlini üzüb.

Bununla belə, Fəqan fəxri kürsüyə yüksələ bilib. Həmyerlimiz təsəlliverici görüşdə Arer Ferrero (Fransa) üzərində qələbə qazanaraq, çempionatın bürünc medalını boynundan asıb.

Qeyd edək ki, yığmamızın digər üzvləri Ramin Qurbanov (81 kq) və Elmar Qasımov (100 kq) qarşıdakı günlərdə çıxış edəcəklər.