Döyüş növləri

Ana səhifə

Döyüş növləri

Şəkidə Prezident Kuboku uğrunda çövkən milli oyunlarının açılış mərasimi keçirilib

19 dekabr 2010 18:42 (UTC +04:00)

Şəki. Vüqar Heydərov.-APA. Bu gün Şəkidə Prezident Kuboku uğrunda çövkən milli oyunlarının açılış mərasimi keçirilib. Bu barədə APA-nın Şəki-Zaqatala bürosuna Şəki şəhər icra hakimiyyəti aparatından məlumat verilib. Məlumata görə, Mədəniyyət və Turizm Nazirliyinin təşkilatçılığı və Şəki şəhər İcra Hakimiyyətinin dəstəyi ilə keçirilən yarışlar Şəki rayonunun Daşüz kəndində yerləşən Respublika Atçılıq Turizm Mərkəzində təşkil edilib.

Açılış mərasimində Mədəniyyət və Turuzm Nazirliyinin şöbə müdürləri Cavanşir Cəfərov və Fikrət Mehdiyev, Şəki şəhər icra hakimiyyəti başçısının təhsil, səhiyyə və mədəniyyət işləri üzrə müavini Zərinə Cavadova, müvafiq təşkilat nümayəndələri və rayon ictimaiyyəti iştirak edib.

Dekabrın 18-dən 22-dək davam edəcək yarışların keçirilməsində məqsəd xalqımızın qədim milli oyunlarını qorunub saxlamaq, qədim tarixə malik atçılıq ənənələrinin bərpası, atçılıq turizminin təbliği və inkişafı, habelə gənc nəsildə bu sahəyə marağın oyadılmasıdır.

Yarışlara Balakən, Zaqatala,Qax, Şəki, Oğuz, Qəbələ, İsmayıllı, Ağdaş, Bərdə, Yevlax, Qazax, Ağstafa, Ağcabədi, Goranboy və Ağdam rayonlarını təmsil edən komandalar qatılıb.

Komandalar çövkən, sür-papaq, papaq və atüstü güləş oyunları üzrə qüvvələrini sınayacaqlar. Yarışların sonunda münsiflər heyətinin qərarı ilə qalib olmuş komandalar Mədəniyyət və Turuzm nazirliyinin diplom və mükəfatları ilə təltif ediləcək.

Qeyd edək ki, Prezident Kuboku uğrunda çövkən milli oyunları 2006-ci ildən bəri Mədəniyyət və Turizm Nazirliyinin təşkilatçılığı və Şəki şəhər İcra Hakimiyyətinin dəstəyi ilə keçirilir. Bu yarışlar sayca artıq beşincidir.