Döyüş növləri

Ana səhifə

Döyüş növləri

Taekvondoçularımızın lisenziya turnirində rəqibləri müəyyənləşib

29 iyun 2011 07:42 (UTC +04:00)

Bakı-APA. Taekvondo üzrə 2012-ci ildə Londonda keçiriləcək Yay Olimpiya Oyunlarına lisenziya verən dünya təsnifat turnirinin püşkatması keçirilib. Apasport.az saytının məlumatına görə, sabah Bakıda start götürəcək yarışda Azərbaycan milli komandasının 4 üzvünün rəqibləri müəyyənləşib.

Taekvondoçularımızdan Günay Ağakişiyeva (57 kq) və Ramin Əzizov (80 kq) mübarizəyə II mərhələdən qatılacaqlar. Ağakişiyeva Filka Atanasova (Bolqarıstan) – Paoli Andrea (Livan) döyüşünün qalibi ilə qarşılaşacaq. Əzizov (80 kq) isə II mərhələdə Flamur Zuberi (İsveçrə) – Lai Li (Çin) görüşünün güclüsü ilə üz-üzə gələcək.

Digər taekvondoçularımızdan Fəridə Əzizova (67 kq) ilk mərhələdə Franka Aniçlə (Slovakiya), Elvin Məmmədov (68 kq) isə Viktor Yankovskiylə (Çexiya) döyüşəcək.

Qeyd edək ki, idmançılarımızdan Fəridə Əzizova yarışın ilk günü, Elvin Məmmədov ertəsi gün, Ramin Əzizov iyulun 2-də tatamiyə çıxacaqlar. Turnirin son günü – iyulun 3-də isə Günay Ağakişiyeva mübarizəyə qoşulacaq. Yarışda yalnız mükafatçılar London Olimpiadasına vəsiqə qazanacaqlar.