Döyüş növləri

Döyüş növləri

Azərbaycan taekvondoçusu Fəridə Əzizova London Olimpiadasına lisenziya qazanıb

30 iyun 2011 15:31 (UTC +04:00)

Apasport.az saytının məlumatına görə, "Sərhədçi" Olimpiya Mərkəzində keçirilən bu mötəbər yarışın ilk günündə Azərbaycan milli komandasının 4 üzvündən yalnız Fəridə Əzizova (67 kq) tatamiyə çıxıb. Digər taekvondoçularımız - Elvin Məmmədov (68 kq) sabah, Ramin Əzizov (80 kq) iyulun 2-də tatami üzərinə çıxacaq, Turnirin son günü – iyulun 3-də isə Günay Ağakişiyeva (57 kq) mübarizəyə qoşulacaq.

Fəridə Əzizova (67 kq) ilk mərhələdə Franka Aniçlə (Slovakiya) üz-üzə gəlib. I raundda bərabər mübarizə getsə də, dəqiqələr ötdükcə həmyerlimiz üstünlüyü ələ alıb. Bunun nəticəsi olaraq, II raundun fasiləsinə 2:0 hesablı üstünlüklə yollanan Əzizova son hissədə rəqibin hücuma keçməsindən maksimum yararlanıb. Əks-hücum taktikasını seçən Fəridə sonda 5:0 hesablı qələbə qazanıb.

Növbəti döyüşdə onun rəqibi amerikalı Peyc Makferson olub. Qarşılıqlı hücumlar şəraitində keçən döyüşün ilk raundu Əzizovanın üstünlüyü ilə bitib – 1:0. Növbəti raundda taekvondoçular xal qazana bilməsələr də, son hissədə həmyerlimiz aktivinə daha 1 xal yazaraq rəqibini 2:0 hesabı ilə məğlub edib.

Nəticədə 1/4 finala vəsiqə qazanan təmsilçimiz yarımfinala yüksəlmək uğrunda kanadalı Karen Serdjeli ilə döyüşüb. Bərabər səviyyədə keçən görüşün ilk 2 raundu heç-heçə başa çatıb. Lakin son raundda təşəbbüsü əla alan taekvondoçumuz rəqibindən 1 xal alıb və yarımfinala vəsiqə qazanıb. Fəridə Əzizovanın finala gedən yolda rəqibi isveçli Elin Yohanson oldu. Rəqibi üzərində inamlı qələbə qazanan (4:0) Əzizova həm finala, həm də London Olimpiadasına vəsiqə qazanıb.

Qeyd edək ki, 8 çəki dərəcəsi üzrə keçirilən turnirdə 109 ölkədən 345 taekvondoçu qüvvəsini sınayır. İyulun 3-ə kimi davam edəcək yarışda yalnız ilk “üçlük”də qərarlaşan idmançılar Olimpiya Oyunlarına lisenziya qazanacaqlar.