Döyüş növləri

Döyüş növləri

Elnur Məmmədli “World Masters”in qalibi olub

16 yanvar 2012 06:50 (UTC +04:00)

Bakı- APA. Qazaxıstanın Almatı şəhərində keçirilən cüdo üzrə “World Masters” seriyasında üçüncü beynəlxalq turnir başa çatıb. Apasport.az saytının məlumatına görə, Olimpiadaya lisenziya xalı verən yarış Olimpiya çempionu Elnur Məmmədlinin qızıl medal qazanması ilə yadda qalıb. Cüdoçumuz həlledici mərhələdə yaponiyalı Takahiro Nakaya ippon xalı ilə qalib gəlib. O, bununla həm 6 min ABŞ dolları, həm də 400 Olimpiya xalı qazanıb.

Digər cüdoçularımız - İlqar Müşkiyev (60 kq), Tərlan Kərimov (66 kq) və Kifayət Qasımova (57 kq) isə Məmmədlidən fərqli, ilk görüşdəcə uduzaraq mübarizəni dayandırıblar. Müşkiyev fransalı Sofian Milousa, Kərimov monqolustanlı Tsaqanbaatar Xaşbaatara, Qasımova braziliyalı Rafaela Silvaya yenilib.

Ramilə Yusubova (63 kq) isə ilk görüşündə israilli Alise Şlesingeri 35 saniyəyə üstələsə də, növbəti qarşılaşmasında Miki Tanakaya uduzaraq mübarizəni dayandırıb. Elxan Məmmədov (90 kq) da ilk görüşünü qələbə ilə başa vurub. Lakin həmyerlimiz Özbəkistan təmsilçisi Xurşid Nebiyevi məğlub etsə də, ikinci qarşılaşmasında Brazilya cüdoçusu Tiaqo Kamilo məğlub olub. Nəticədə Yusubova və Məmmədov “World Masters”də 5-ci yeri tutaraq, aktivlərinə 80 lisenziya xalı əlavə ediblər.