Döyüş növləri

Ana səhifə

Döyüş növləri

Fuad Əsədov: “Azərbaycan və Ermənistan yığmaları arasında oyunların harada keçirilməsi məsələsi ilə bağlı UEFA aprelin 12-də qərar verəcək”

10 mart 2007 12:00 (UTC +04:00)

- AFFA İcraiyyə Komitəsinin martın 16-da keçiriləcək iclasında hansı məsələlər müzakirə olunacaq?
- Həmin iclasın gündəliyində yalnız AFFA-nın aprelin 26-da keçiriləcək növbəti konfransının gündəliyinin təsdiqlənməsi məsələsi olacaq. Konfransda isə hər il olduğu kimi, ilin nəticələrinə baxılacaq. Yəni görülən işlərlə bağlı auditor təşkilatının hesabatı dinləniləcək, növbəti il üçün auditor təşkilatı təsdiqlənəcək, büdcə qəbul olunacaq. Ola bilsin, iclasın gedişində başqa məsələlər də ortaya çıxsın. Amma ilkin məsələlər ötən ilki konfransda müzakirəyə çıxarılanlardır. Bu da AFFA Nizamnaməsinin müvafiq bəndlərinə uyğundur.
- Gənclər və idman naziri Azad Rəhimov AFFA-nın konfransında legioner limitinin artırılacağını bildirib. İndiyədək klublardan AFFA-ya bununla bağlı rəsmi müraciət daxil olubmu?
- AFFA-nın Nizamnaməsinə əsasən, konfransdan üç ay öncə federasiyanın bütün üzvlərinə rəsmi bildiriş göndərmişik. Aprelin 26-da keçiriləcək konfransa 45 gün qalmışadək təkliflər verilməlidir. Hələlik legioner limitinin artırılması ilə bağlı klublardan müraciət daxil olmayıb.
- UEFA prezidenti Mişel Platini Azərbaycan və Ermənistan milli komandaları arasında Avropa çempionatının seçmə qrup oyunlarının böyük ehtimalla neytral meydanda keçiriləcəyini bildirib...
- Platini bu məsələyə yaxın vaxtlarda baxılacağını deyib. Yaxın vaxt da aprelin 12-dir. Artıq bu barədə AFFA-ya məktub göndərilib. Bizi aprelin 12-də keçiriləcək müvafiq komissiyanın iclasına dəvət ediblər. Həmin gün oyunların neytral meydanda, yoxsa Bakı və İrəvanda keçirilməsinə dair ilkin qərar qəbul olunduqdan sonra baxılmaq üçün UEFA İcraiyyə Komitəsinin bir həftə sonra Uelsin paytaxtı Kardiff şəhərində keçiriləcək iclasına göndəriləcək. Oyunların neytral meydanda keçirilməsinə dair yekun qərar verilsə, biz Ukrayna, İsveçrə və ya Avstriya variantlarını təklif edəcəyik. Oyunların konkret, hansı ölkədə keçiriləcəyi isə sonradan bizim Ermənistan tərəfi ilə apardığımız danışıqlardan asılı olacaq.
- Oyunların Ukraynanın Donetsk şəhərində keçirilmə ehtimalının daha çox olduğu bildirilir...
- Bizim adlarını çəkdiyimiz üç ölkə arasında Ukrayna da var. Ermənistan tərəfi də razılıq versə, oyunlar bu ölkədə təşkil oluna bilər. Konkret, hansı şəhərdə olacağını isə deyə bilmərəm.
- Yeri gəlmişkən, FİFA prezidenti Zepp Blatterlə UEFA prezidenti Mişel Platininin ölkəmizə səfərinin vaxtı dəqiqləşibmi?
- Xeyr. Çünki Platinin nə vaxt gələcəyi hələ bilinmir. Bu günlərdə Gürcüstanda səfərdə olanda o, Bakıya da gələcəyini bildirib. UEFA prezidenti seçilməmişdən öncə Platini istədiyi vaxt istədiyi yerə gedə bilirdi. Amma indi vəzifə başındadır. O qədər işi var ki... Əvvəlcə belə bir ehtimal var idi ki, Platini UEFA İcraiyyə Komitəsinin aprelin 18-də keçiriləcək iclasının ertəsi gün Bakıya gələcək. Həmin ərəfədə Blatter Pakistanda olacaq. O da oradan Azərbaycana gəlməli idi. Sonradan məlum oldu ki, UEFA İcraiyyə Komitəsi aprelin 18-də yox, 19-da yığışacaq. Buna görə də FİFA və UEFA prezidentlərinin Bakıya nə vaxt gələcəklərini bilmirik.
- FİFA və UEFA prezidentlərinin səfəri zamanı yalnız AFFA-nın ofisinin açılışı nəzərdə tutulur?
- Şübhəsiz ki, onlar AFFA-nın ofisinin açılışında bir saat ərzində iştirak etdikdən sonra təyyarəyə minib getməyəcəklər. Blatter və Platini üçün səfər proqramı tərtib olunacaq. Onlar gəlsələr, iki gün Bakıda olacaqlar. Bu müddətdə AFFA-nın ofisindən başqa, beynəlxalq futbol qurumlarının vəsaiti hesabına tikilən mini-futbol meydançalarına da baxmalıdırlar. Yəqin ki, prezident İlham Əliyevlə, gənclər və idman naziri Azad Rəhimovla da görüşəcəklər. Bunların hamısı tərtib edəcəyimiz proqramda əksini tapacaq.
- Blatter və Platininin rayonlarda tikilən mini-futbol meydançalarına da baş çəkəcəyi gözlənilirmi?
- Bu, artıq onların özlərindən asılıdır.
- 21 yaşlılardan ibarət yığmamızın Avropa çempionatının seçmə qrup mərhələsindəki oyunlarının təqvimi nə vaxt müəyyənləşəcək?
- Qrup mərhələsinin püşkü martın 13-də atılıb. Reqlamentə əsasən, oyunların təqvimi püşk atıldıqdan bir ay sonra təsdiqlənməlidir. UEFA yığmamızın yer aldığı 1-ci seçmə qrupun təqvimini tezliklə bizə göndərəcək.
- Futzal Federasiyasının prezidenti Ağarza Rzayev AFFA İcraiyyə Komitəsinin iclasında Baba Əsgərovun futzal üzrə yığma komandanın baş məşqçisi vəzifəsinə təsdiqlənəcəyini bildirib...
- Ağarza Rzayevin yığma komandanın baş məşqçisinin təyinatı məsələsinə nə dəxli var? O, federasiya prezidenti kimi yalnız təklif verə bilər. Hələlik futzal yığmamız Baba Əsgərova həvalə olunub. Baş məşqçi təyin edəndə, Futzal Federasiyası rəhbərliyinin də, yığmada çalışanların da, AFFA Futzal Komitəsinin də fikrini nəzərə alacağıq. Amma konkret qərarın nə vaxt veriləcəyini deyə bilmərəm.
- Futzal üzrə yığma komandamızın Hollandiyada keçirilən Avropa çempionatının seçmə oyununda üzləşdiyi haqsızlıqla bağlı AFFA UEFA-ya rəsmi şikayət məktubu göndəribmi?
- Hazırda həmin məktubu hazırlamaqla məşğuluq. Məktuba Serbiya ilə oyunumuz vaxtı futbolçumuza qarşı törədilən təxribatı əks etdirən fotoşəkilləri və Hollandiya mətbuatının bu barədə yazılarını əlavə etmişik. Biz həmin məktubu martın 12-də UEFA-ya göndərəcəyik. Amma oyunun yenidən keçirilməsi qeyri-mümkündür. UEFA Serbiya Futbol Federasiyasını cərimələyə bilər.
- Millimizin oyunçusu Sergey Sokolov qanında dopinq aşkarlandığına görə, AFFA-ya kəsilən cəriməni ödəmisinizmi?
- Cəriməni nəyə görə ödəməli olduğumuzla bağlı UEFA-ya göndərdiyimiz üçüncü sorğu-məktuba hələ cavab almamışıq. Cəriməni isə ödəməmişik. Amma adətən, bu belə olur: Cərimələnən milli federasiyanın hesabına UEFA tərəfindən hansısa proqramın icrası məqsədilə vəsait köçürülərkən, cəriməni həmin vəsaitdən çıxırlar. Yəqin ki, indiyədək həmin cəriməni tutublar. /APA/