Döyüş növləri

Döyüş növləri

Azərbaycanın 17 yaşlılardan ibarət yığma komandası Avropa çempionatının ikinci seçmə mərhələsində keçirdiyi hər iki oyunda məğlub olub

27 mart 2007 08:39 (UTC +04:00)

Futbol üzrə 17 yaşlılardan ibarət Azərbaycan yığma komandası Bosniya və Herseqovinada keçirilən 2007-ci il Avropa çempionatının ikinci seçmə mərhələsində keçirdiyi hər iki oyunda məğlub olub. “APA-Sport” agentliyinin məlumatına görə, Yaşar Vahabzadənin baş məşqçisi olduğu millimiz martın 23-də keçirdiyi ilk görüşdə Serbiyaya 1:5 hesabı ilə uduzub. Komandamızın yeganə qolunun müəllifi 36-cı dəqiqədə penaltidən fərqlənən Emin Mustafayev olub. Qeyd edək ki, bu, 17 yaşlılardan ibarət yığmamızın tarixində ən böyük hesabla məğlubiyyəti olub. Qrupda ikinci oyununda İngiltərə ilə qarşılaşan yığmamız 0:1 hesabı ilə yenilib. Artıq oyunun 6-cı dəqiqəsində qırmızı vərəqə alaraq meydandan qovulan futbolçusuna görə, azlıqda qalmasına baxmayaraq, İngiltərə 48-ci dəqiqədə qələbə topunu vurub. İki oyundan sonra Bosniya və Herseqovina yığması ilə qrupda 3-4-cü pillələri bölüşdürən komandamız rəqibini topların daha yaxşı fərqinə görə qabaqlayır. Yığmamız qrupda sonuncu oyununu sabah meydan sahiblərinə qarşı keçirəcək. /APA-Sport/