Döyüş növləri

Döyüş növləri

Yari Litmanen: “Meydança pis vəziyyətdə olduğundan uduzduq”

29 mart 2007 09:04 (UTC +04:00)

“Meydança pis vəziyyətdə olduğundan uduzduq. Adi ötürmə verməyə belə çətinlik çəkirdik. Top kələ-kötür ot örtüyünə dəyərək, istiqamətini dəyişirdi”. Bu sözləri Azərbaycan milli komandasına məğlubiyyətdən sonra Finlandiya yığmasının kapitanı Yari Litmanen “APA-Sport” agentliyinə açıqlamasında deyib. 36 yaşlı yarımmüdafiəçi məğlubiyyətin gözlənilməz olduğunu bildirib: “Azərbaycandan xalsız dönəcəyimizi gözləmirdim. Bu gün həddən artıq zəif oynadıq. Öz qüvvəmizdən aşağı səviyyədə çıxış etdik. Məğlubiyyət bizə çox pis təsir edib”. Y.Litmanen Finlandiya yığmasının oyun ərzində cəmi 1-2 real qol şansı qazandığını söyləyib. Futbolçu vurğulayıb ki, Azərbaycan milli komandasının qapısına qol vura bilməməkləri qapıçının inamlı oyunu ilə bağlıdır: “Ümumiyyətlə, təhlükəli vəziyyət yaratmağa çətinlik çəkirdik. Biz xüsusilə standart vəziyyətlərdə fərqlənəcəyimizə ümid edirdik. Ancaq cərimə zərbələri və künc ötürmələri zamanı rəqib komandanın qapıçısı yaxşı oynadı”. Y.Litmanen növbəti seçmə oyunlarda yığmanın uğurlu nəticələr qazanacağını bildirib: “Qarşıdakı matçlarda daha yaxşı nəticə qazanmağa çalışacağıq. İnanıram ki, Bakıda itirilən xalları seçmə mərhələnin gedişində geri qaytaracağıq”.
Qeyd edək ki, Y.Litmanen indiyədək Azərbaycan və Finlandiya arasında keçirilən 5 rəsmi matçın 4-də forma geyib. /APA-Sport/