Döyüş növləri

Döyüş növləri

Azərbaycan yığmasının keçmiş müdafiəçisi Sergey Sokolova görə, UEFA-nın AFFA-ya kəsdiyi cəriməni “Qarabağ” klubu ödəyəcək

29 mart 2007 09:32 (UTC +04:00)

2006-cı il oktyabrın 11-də Avropa çempionatının seçmə mərhələsi çərçivəsində keçirilən Belçika Azərbaycan görüşündən sonra qanında istifadəsi qadağan olunan dərman preparatı tapılan Sergey Sokolova görə UEFA Nizam-İntizam Komitəsi (NİK) tərəfindən kəsilən 8000 İsveçrə frankı məbləğində cəriməni “Qarabağ” klubu ödəyəcək. “APA-Sport” agentliyinin məlumatına görə, bu haqda qərar AFFA-nın Nizam-İntizam Komitəsinin (NİK) toplantısında qəbul olunub.
Qeyd edək ki, “Qarabağ” klubunun və millinin keçmiş müdafiəçisi S.Sokolov 18
ay müddətinə, yəni 2008-ci il iyunun 10-dək bütün yarışlardan kənarlaşdırılıb. Müdafiəçi Azərbaycan milli komandasının üzvü olduğu üçün, AFFA 8000 İsveçrə frankı məbləğində cərimələnib. Lakin UEFA-nın Dopinq Komitəsinin apardığı araşdırma zamanı məlum olub ki, millinin rəhbərliyinin və həkiminin S.Sokolovdan götürülən dopinq-testin cavabının müsbət nəticələnməsində heç bir günahı yoxdur. Buna görə də, UEFA NİK-i komandanın həkimi Ramiz Kərimovun üzərindən məsuliyyətin götürülməsi barədə qərar qəbul edib. Həmçinin, aparılan araşdırmalar zamanı müəyyən edilib ki, S.Sokolov 2006-cı ilin avqustunda UEFA Kuboku çərçivəsində keçirilən “Qarabağ” “Zimbru” oyunu zamanı zədələnib və “Qarabağ” klubunun həkim heyəti tərəfindən təxminən üç ay ərzində fərdi qaydada müalicə edilib. UEFA NİK-nin millinin həkiminin məsuliyyətdən azad olunması ilə bağlı qərarı belə hesab etməyə əsas verir ki, S.Sokolov “Qarabağ”ın heyətində müalicə alarkən, qəbul etdiyi dərmanların tərkibində qadağan edilmiş pereparat olub. Məhz bunu nəzərə alan AFFA NİK-i 8000 İsveçrə frankı məbləğində cərimənin “Qarabağ” klubu tərəfindən ödənilməsi barədə qərar çıxarıb. /APA-Sport/