Döyüş növləri

Döyüş növləri

İsgəndər Cavadov: “Milli komandamızın Finlandiya üzərindəki qələbəsi sabun köpüyündən başqa bir şey deyil”

30 mart 2007 14:17 (UTC +04:00)

Veteran futbolçu İsgəndər Cavadovun “APA-Sport” agentliyinə müsahibəsi

- Yığmamızın Finlandiya üzərindəki qələbəsini necə qarşıladınız?
- Milli komandanı Finlandiya üzərindəki qələbə münasibətilə təbrik edirəm. Bu cür qələbələr bizə lazımdır. Amma bir qələbə ilə çox “atılıb-düşməyin” yeri yoxdur. Belə hallara əvvəlki tsikllərdə də nadir hallarda rast gəlinib. Sonrası nə olub? Məgər bir oyunla Azərbaycan futbolunda çevriliş ediblər? Daim böyük hesabla uduzurlar. Bir qələbə ilə hansı irəliləyişdən danışırlar? İndiki vəziyyətdə bu gedişlə futbolun inkişafı mümkün deyil. Komandamızın real gücünü cari seçmə tsiklin sonunda biləcəyik.
- Belə hesab edirsiniz ki, millimizin qələbəsinin davamı gəlməyəcək?
- Əlbəttə gəlməyəcək! Bir qələbə qazanıb, gözümüzü bağlayırıq. Deyirik ki, gələcəkdə də belə qələbələr olacaq. Xeyr! Heç nə olmayacaq! Mən açıq deyirəm: millimizin Finlandiya üzərindəki qələbəsi sabun köpüyündən başqa bir şey deyil. 0:5 hesablı məğlubiyyətdən dörd gün sonra qazanılan bir qələbə ilə yaxın müddətdə çevriliş etmək mümkün deyil. Avropanın elə güclü komandaları var ki, zəiflərlə oyunda qələbə qazanmaqda çətinlik çəkirlər. Finlandiya yığması bizi böyük hesabla yenən Polşanı səfərdə məğlub etmişdi. İndi finlər gəlib Bakıda bizə uduzublar. Nə olsun?
- İyunda yığmamız Bakıda böyük hesablarla məğlub olduğu Polşa ilə qarşılaşacaq. Bu görüşdə millimizin şansını necə görürsünüz?
- İnanmıram ki, polşalıları da Bakıda məğlub edək. Çünki onlar Finlandiyanın məğlubiyyətindən nəticə çıxararaq, qarşıdakı oyuna ciddi yanaşacaqlar.
- AFFA-nın baş katibi Fuad Əsədov veteranların fikirlərinin bu gün heç kimə lazım olmadığını və onların vaxtının getdiyini bildirib...
- Bizim vaxtımız getməyib. Əksinə, onların vaxtı keçib. Əsədovun yaşı yetmişə çatıb, onun özü “o dünyalıqdır”. Yəni qəbirlikdir. Artıq veteran futbolçuların 90 faizini “o tərəflərə” yola salıblar. Ona görə də Əsədov bizim vaxtımızın keçdiyini deyir. Amma hələ cavanıq və sözümüzü deyəcəyik. Narahat olmasınlar.
- AFFA rəhbərliyinə qarşı radikal çıxışlarınızın milli komandada forma geyinən yaxın qohumlarınız İlqar Qurbanovla Vaqif Cavadovun karyeralarına mənfi təsir edəcəyindən çəkinmirsiniz?
- Əgər federasiya rəhbərliyi belə addım atsa, savadsız və ağılsız hərəkət etmiş olacaq. Vaqif də, İlqar da gənc futbolçudurlar. Oynaya bilirlərsə, oynamalıdırlar. Amma AFFA rəhbərliyi onları futboldan kənarlaşdırmaq yolunu tutsa, məsuliyyət elə federasiyanın üzərinə düşəcək. Sözlərimə görə, özüm cavabdehəm. Mən də azərbaycanlıyam, başqa millətdən deyiləm. Mənim qədər futbol anlayışlarının olması üçün AFFA rəsmiləri yenidən dünyaya gəlməlidirlər. İsgəndər Cavadov nə deyibsə, elə də olacaq!
- Həm Fuad Musayev, həm də Ramiz Mirzəyevin fəaliyyətini bəyənmirsiniz. Bəs sizcə, onlardan hansının fəaliyyətində müsbət cəhətlər var?
- Hər ikisinin fəaliyyəti qeyri-qənaətbəxşdir. Amma nisbətən Musayev nə isə etmişdi. Yaxşı nəticələr verə bilərdi, lakin bəzi ağılsız hərəkətləri üzündən postunu itirdi. Amma indi baxın. Hansı milli komandadan danışmaq olar ki, orada 7-8 əcnəbi futbolçu çıxış edir?
- Finlandiya ilə oyundan sonra ölkə prezidenti İlham Əliyevə müraciət etmək istədiyinizi bildirmişdiniz. Bu məsələ yenə gündəmdədir?
- Prezident İlham Əliyev bütün idman növlərini diqqətdə saxlayır. Yəqin ki, o, futbolumuzun da hansı vəziyyətdə olduğundan xəbərdardır. Futbol azarkeşi olduğunu özü də dəfələrlə etiraf edib. Buna görə də biz veteran futbolçular kimi, futbolumuzun hazırkı durumuna biganə qala bilmərik. Yəqin ki, tezliklə yığışıb, ölkə prezidentinə müraciət edəcəyik.
- Bəlkə, yığmamızın Finlandiya üzərində qazandığı qələbədən sonra planlarınızı dəyişmisiniz?
- Şəxsən mənim planlarımda heç bir dəyişiklik olmayıb. Yenə öz sözümü deyirəm. Amma veteranlardan elələri var ki, məğlubiyyət olan kimi danışmağa başlayırlar, qələbə təqdirində isə susmağı üstün tuturlar. Əslində, futbol ictimaiyyətinin 90 faizi AFFA rəhbərliyinin fəaliyyətindən narazıdır. /APA-Sport/