Döyüş növləri

Döyüş növləri

Azərbaycanın millət vəkilləri Rumıniyaya İsgəndər Cavadovun məşqçiliyi altında yollanacaqlar

03 aprel 2007 13:00 (UTC +04:00)

Azərbaycanın veteran futbolçuları Oqtay Abdullayev və İsgəndər Cavadov deputatlardan ibarət yığma komandamızla birgə aprelin 23-də Rumıniyanın paytaxtı Buxarestə yollanacaqlar. Bu haqda “APA-Sport” agentliyinə millət vəkili Zahid Oruc məlumat verib. Onun sözlərinə görə, Azərbaycan və Rumıniyanın parlamentlərarası dostluq əlaqələrinin gücləndirilməsinə xidmət edən görüşə komandamızı O. Abdullayevlə İ. Cavadov hazırlayır: “Hər iki mütəxəssis bizə oyun qaydalarının minimum tələblərini yerinə yetirilməsində və hazırlıq prosesində müəyyən məsləhətlər, tövsiyələr verirlər. Onların tövsiyələrinin bizə böyük köməyi dəyir”.
Qeyd edək ki, millət vəkilləri qarşıdakı oyuna hazırlıq prosesi çərçivəsində aprelin 1-də Tofiq Bəhramov adına Respublika stadionunda veteranlarla yoldaşlıq görüşü keçiriblər. Keçmiş FİFA referisi Xaqani Məmmədovun idarə etdiyi görüş 6:6 hesablı heç-heçə ilə bitib. /APA-Sport/