Döyüş növləri

Döyüş növləri

İngiltərənin İMG teleşirkəti Azərbaycan Ermənistan oyunlarını lentə almaq istəyir

05 aprel 2007 15:35 (UTC +04:00)

İngiltərənin İMG teleşirkətinin rəhbərliyi Avropa çempionatının seçmə qrup mərhələsi çərçivəsində sentyabrda Azərbaycan və Ermənistanın futbol yığmaları arasındakı oyunlarını lentə almaq istəyir. UEFA-nın Azərbaycan üzrə media nümayəndəsi Erkin İbrahimovun “APA-Sport” agentliyinə verdiyi məlumata görə, bu görüşlər zamanı İMG teleşirkətinin əməkdaşlarının da çəkiliş aparacağı gözlənilir. İngilislər bu fikirdə olduqlarını Bakıya səfərləri zamanı bildiriblər. FİFA-nın xətti ilə müxtəlif ölkələrdə futbolla bağlı proqram hazırlayan teleşirkətin əməkdaşları səfər ərzində Azərbaycan Finlandiya, “Qarabağ” “Bakı” qarşılaşmalarında, həmçinin, “Neftçi” və “Qarabağ” klublarının məşqində çəkiliş aparıblar. Lentə alınan kadrlar əsasında İMG iki proqram hazırlayacaq. Bunlardan biri Azərbaycan futboluna, digər isə “Neftçi”nin müdafiəçisi Rəşad Sadıqova həsr ediləcək. E.İbrahimov bildirib ki, proqramların ilkin variantları təxminən 3 həftədən sonra hazır olacaq. Hər iki proqram mayda efirə çıxacaq.
Qeyd edək ki, baş ofisi Londonda yerləşən İMG teleşirkətinin iki nümayəndəsi Cek Uezli və Stiv Lidjervud az öncə Bakıda olublar. /APA-Sport/