Döyüş növləri

Ana səhifə

Döyüş növləri

“Fənərbaxça” klubunun sabiq futbolçusu Turhan Sofuoğlu: “Bakıya müqavilə bağlamağa gəlmişik”

06 aprel 2007 13:25 (UTC +04:00)

“Uşaq futbol bölmələri olmayan komandanın çempionluq əldə etməsinin heç bir mənası yoxdur”. Bu fikirləri “APA-Sport” agentliyinə eksklüziv açıqlamasında Türkiyə yığmasının və “Fənərbaçxa” klubunun sabiq futbolçusu Turhan Sofuoğlu bildirib. T.Sofuoğlu fikirlərini əsaslandırmaq üçün “Qalatasaray” klubunu nümunə göstərib: “Qalatasaray” 2000-ci ildə UEFA kubokunu qazanmaqla, gündəmdə qaldı. Türkiyəni dünyada tanıtdı, amma özünə çox böyük zərər verdi. Klub hazırda borc içindədir. Aparıcı futbolçularını heyətdə saxlaya bilmirlər”. T.Sofuoğlu belə olmaqdansa, təməli qoyulan çempionluğun daha uzun müddətli və tarixə daha yaxşı düşməsini mühüm məsələ sayıb. Millidə əcnəbilərin çıxış etməsinə münasibət bildirən T.Sofuoğlu daha çox keyfiyyətə, istedada önəm verilməsini vacib hesab edib: “Mən əcnəbilərdən öyrənməli olduğumu, onların etdikləri bütün hərəkətlərin doğru olduğunu düşünmürəm. Amma onların bizə verəcəkləri bəzi şeylər varsa, öyrənmək lazımdır. Türkiyə və ya Azərbaycan futbolunun inkişafına nail olacağıqsa, yerli və ya əcnəbi olmasından asılı olmayaraq, onu heyətə cəlb etmək lazımdır. Biz özümüz üçün yox, dünya ilə yarışırıqsa, dünyadakı yenilikləri də ölkəmizdə tətbiq etməyimiz lazımdır”.
“Qalatasaray” klubunun sabiq futbolçusu Uğur Tütünəkər də bu fikirlə razılaşıb: “Məncə, çox yüksək səviyyədə olan, yerlilərdən fərqlənən əcnəbi futbolçunun yığmada oynaması qəbulolunandır. Belə olan halda, yerli futbolçular əcnəbidən nə isə öyrənə bilərlər. Məsələn, rumıniyalı George Hacıdan Türkiyədə bir çox yerli futbolçu öyrəndi. Amma əcnəbi futbolçu yerli ilə eyni səviyyədədirsə, onun milliyə götürülməsi qəbuledilməzdir. Türkiyə millisində də braziliyalı Marko Aurelio oynayır. Onun bizim yığmaya çağırılması barədə də fikirlər müxtəlifdir. Mən Aureliodan daha yüksək səviyyəli əcnəbinin millimizdə oynamasını istəyirəm”.
“Beşiktaş” klubunun sabiq futbolçusu Rəcəb Çətin isə milliyyətçi mövqedən çıxış edib: “Mən Türkiyə yığmasında sırf türk oyunçuların çıxış etməsini arzulayıram. Əgər əcnəbi gəlib, Türkiyənin bayrağını dalğalandıracaqsa, bizim Türkiyədə yaşamağa haqqımız yoxdur. Mənim komandamda mənim millətimin oyunçuları çıxış etməlidir. Eləcə də, Azərbaycan yığmasında”. R.Çətin ölkəmiz haqda da danışıb: “Azərbaycanın belə bir gözəl ölkə olduğunu bilmirdim. Türkiyəyə qayıtdıqdan sonra yaxınlarıma ölkəniz haqda danışacağam”. Sonda hər üç məşqçi Azərbaycanda işləməyə hazır olduqlarını bildirib. U.Tütünəkər “Dərhal imza ataram” söyləyib, T.Sofuoğlu isə “Əslində, Bakıya müqavilə bağlamağa gəlmişik” deyib.
Türkiyənin “Samanyolu” telekanalının idman müdiri Mehmet Şeyho məsələyə qlobal nöqteyi-nəzərdən yanaşıb. O, müasir dünyada futbol sahəsi üzrə 300 milyard dollar vəsaitin dövriyyədə olduğunu söyləyib. BMT-nin 199, FİFA-nın isə 204 üzvü olduğunu xatırladan M.Şeyho dünyada dövriyyədə olan vəsaitin 1/5 hissəsinin futbol sektorunda olduğunu vurğulayıb: “Bu qədər vəsaitdən pay almaq üçün hər bir ölkə müxtəlif yollara baş vurur. Polşada, Almaniyada zəncilər yaşamır. Amma bu ölkələrin milli komandalarında qaradərili futbolçular çıxış edir. Bu cür addımların doğru və ya yanlış olduğu mübahisəli mövzudur. Amma 300 milyardlıq vəsaitdən pay almaq üçün mütləq müəyyən çalışmaları yerinə yetirmək lazımdır. Əks halda, heç bir şansınız yoxdur. “Fənərbaxça”, “Qalatasaray” və “Beşiktaş” klublarının çempionluqlarında əcnəbi məşqçilərin imzası olub. Məmləkəti, milləti sevmək mütləq lazımdır. Amma iqtisadi şərtləri də nəzərə almaq lazımdır. Əks halda, daim uduzan tərəf olarsınız”.
Türkiyə Superliqasının və yığma komandasının oyunlarının “Samanyolu”nda göstərilməməsini telekanalın idman müdiri hər iki yarışın yayın hüququnun baha qiymətə satılması ilə əlaqələndirib: “Superliqanın yayım hüququ “Digitürk Lig TV” telekanalına çox yüksək məbləğə satılıb. Bir matçın canlı yayını həmin telekanala təqribən 2 milyon dollara başa gəlir. Digər telekanallar Superliqanın hər oyunundan fraqmentlər göstərmək üçün “Lig TV”yə bir dəqiqəsinə 4 min dollar ödəməlidirlər. 9 oyundan ibarət bir turda hər oyundan 3 dəqiqəlik fraqment üçün, ümumilikdə, 108 min dollar ödəmək lazım gəlir. Bu, ayda 500 min, ildə isə 4 milyon dollar deməkdir”. /APA-Sport/