Döyüş növləri

Ana səhifə

Döyüş növləri

Gökmən Özdəmir: “Ərəblər “Qalatasaray” klubunun maddi sıxıntısından istifadə edib, öz şərtlərini diktə etmək istəyirlər”

11 aprel 2007 09:00 (UTC +04:00)

Türkiyənin tanınmış idman şərhçisi, “Vətən” qəzetinin idman yazarı Gökmən Özdəmir “APA-Sport” agentliyinin Türkiyə bürosuna verdiyi müsahibəsində “Qalatasaray” klubu daxilində baş verən hadisələrə aydınlıq gətirib

- “Qalatasaray” klubundan yazan şərhçi kimi, bu komandadakı vəziyyəti necə qiymətləndirirsiniz?
- Türkiyədə bir sistem var və bu sistemə riayət edən komandalar həmişə müvəffəqiyyət qazanır. Futbol Federasiyası ilə münasibətlərini yaxşı quran klub bu sistemin parçası olur. 2000-2001, 2003-2004-cü illərdə “Fənərbaxça”, ötən il “Qalatasaray” bu sistemdən ustalıqla istifadə edib çempion oldusa, bu il də “Beşiktaş” klubunun eyni yolla getdiyini görürük. Hər kəs bu sistemin bir parçası olduğuna görə, klubların nə iş görəcəyini hamı çox yaxşı bilir. Buna görə də, hamı çığır-bağır salıb sistemin işləməsinə mane olmağa çalışır. Ancaq nəticəni əngəlləməyə heç kimin gücü çatmır. Superliqanın son 7 həftəsinə baxanda “Beşiktaş” və “Fənərbaxça” klublarının çempionluq mübarizəsinin şahidi oluruq. Mən burada “Beşiktaş”a daha çox üstünlük verirəm. Çünki arxasındakı lobbi də güclüdür, oynayacaqları oyunlar daha asandır.
- Yəni hər şeyin sistemə bağlı olduğunu deyirsiniz...
- Bu, əslində leqal bir sistemdir.
- “Qalatasaray”ın ən obyektiv şərhçilərindən birisiniz. Ötən mövsümdə oyunçuların “Qalatasaray”ı çempion etdiyini yazmışdınız. Burada klub rəhbərlərinin və texniki heyətin rolu nə qədərdir?
- “Qalatasaray”da futbolçuların keçmişdən gələn qalib gəlmə vərdişləri var. Bunlar uzun müddətdən bəri müvəffəqiyyət qazana bilmirdilər. Keçən il uğur əldə etmək üçün özlərini hər cəhətdən hazırladılar. Bu mövsümdə isə oyunçuların inanılmaz dərəcədə “doyduqlarını” görürük. Qalib gəlib-gəlməmələrinin onlar üçün fərqi yoxdur.
- Bəs, klub rəhbərləri üçün necə, fərqi varmı?
- Klub pis idarə edilir. Hətta komandada idarəsizlik var. Əvvəlcə futbolçulara yaxşı şərait hazırlanmalı və onlar meydançada güclü olduqlarını hiss etməlidirlər. Komanda bundan sonra daha yaxşı oynayar. Bu mövsüm “Qalatasaray” üçün vaxtından əvvəl başa çatdı. Gələcək mövsüm üçün “Qalatasaray” klubunda böyük dəyişikliklər edilməsi gözlənilir. Ancaq indiki vəziyyətdə bu dəyişikliyi etmək üçün maddi imkan yoxdur.
- Əvəzedici komandadan istifadə edilərsə, vəziyyət necə olar?
- “Qalatasaray” əvəzedici komandasından ən çoxu 3 oyunçu ala bilər. Ancaq əvəzedici heyətdən aldığın oyunçularla böyük hədəflərə yaxınlaşmaq mümkün olmaz. Əgər klub azarkeşlərdən iki il möhlət istəyərsə, bəlkə də ondan sonra qarşıya qoyulan məqsədlərə çatmaq olar. Əks-təqdirdə gənclər də əldən gedə bilər.
- Maliyyə vəziyyətinin yaxşılaşmasına ümid varmı?
- Riva ərazisinin satılması gözlənilir. Ancaq hələ də qənaətbəxş təklif alınmayıb. Rivanın satılması bank borclarının ödənməsinə və yeni kreditlərin daha rahat alınmasına səbəb olacaq. Bu mövsümdə Çempionlar Liqasından “Qalatasaray”a 10,5 milyon avro gəldi. Yeni mövsümdə o da olmayacaq. Böyük maddi sıxıntı olacağını düşünürəm.
- Yeni stadionun təməlinin yaxın vaxtlarda qoyulacağı deyilir...
- İyuldan əvvəl yeni stadionun təməli qoyula bilməz. “First Gulf Bank” adlı bir ərəb bankı ilə Rivanın satışına dair müzakirələr aparılır. Bu bank 40, 50 və 50 milyon dollarlıq 3 təminat məktubu versə də (140 milyon dollar), son təminat məktubunda bir problem var. İndi onu həll etməyə çalışırlar. Ərəblər “Qalatasaray”ın maddi sıxıntısından istifadə edib, öz şərtlərini diktə etmək istəyirlər.
- “Qalatasaray” yaxşı idarə edilmədiyindən bəhs edirsiniz. Bu vəziyyətdə vaxtından əvvəl Konqres keçirilə bilər?
- Vaxtından əvvəl Konqres keçirib klubun yeni rəhbərliyini seçmək lazımdır. Ancaq güclü namizəd çıxmadığına görə vaxtından əvvəl Konqres keçirilmir. 2008-ci ilin martında Ali Dürüst, Hayri Kozak kimi güclü namizədlər çıxarlarsa, seçilə bilərlər. Əks-təqdirdə yenə Özhan Canaydın klubun prezidenti olacaq. /APA-Sport/