Döyüş növləri

Ana səhifə

Döyüş növləri

Zaur Tağızadənin qabırğası əzilib

21 aprel 2007 10:28 (UTC +04:00)

“Neftçi” klubunun kapitanı Zaur Tağızadə “MKT-Araz” ilə Azərbaycan kuboku uğrunda aprelin 23-də keçiriləcək cavab yarımfinal görüşü öncəsi zədə problemi ilə üzləşib. Bu haqda “APA-Sport” agentliyinə “Neftçi” klubunun baş məşqçisi Qurban Qurbanov məlumat verib. Q.Qurbanov futbolçunun cavab yarımfinal oyununda iştirak etməsi üçün klubun həkimlərinin səy göstərdiyini qeyd edib: “Son turda “Karvan”la səfər oyununda Zaurun qabırğası möhkəm əzilib. Bu səbəbdən o, komandanın son hazırlıq prosesindən kənarda qalıb. Tağızadənin “MKT-Araz”la görüşədək sağalmasına çalışırıq. Klubumuzun həkimi Zaurun cavab oyununadək sağaldaraq meydana çıxa biləcəyinə söz verib”.
Q. Qurbanov, həmçinin, bildirib ki, komanda birgünlük istirahətdən sonra bu gün məşqlərini davam etdirəcək. Baş məşqçi təlim-məşq toplanışına başladıqlarını da bildirib: ““Musado” otelində təlim-məşq toplanışına yığışmışıq. Bugünkü məşqimizi Respublika stadionunda keçirəcəyik. Sabahkı hazırlıq prosesi isə Bakıxanov qəsəbə stadionunda olacaq”. /APA-Sport/