Döyüş növləri

Ana səhifə

Döyüş növləri

İqor Nakoneçnı: “Neftçi” ilə döyüşə hazırıq”

21 aprel 2007 11:13 (UTC +04:00)

“Neftçi” ilə döyüşə tam hazırıq”. Bu sözləri “APA-Sport” agentliyinə açıqlamasında İmişlinin “MKT-Araz” klubunun baş məşqçisi İqor Nakoneçnı bildirib. Ukraynalı mütəxəssis ötən ay “Neftçi”yə səfərdə 0:3 hesabı ilə uduzduqları oyundan ciddi nəticə çıxardıqlarını bildirib: ““Neftçi”yə çempionatda böyük hesablı məğlubiyyətimizi ciddi təhlil edərək, buraxdığımız səhvlərdən nəticə çıxarmışıq. Həmin səhvləri kubok oyununda təkrarlamamalıyıq. Heyətimizdə ciddi itkilər olmasına baxmayaraq, “Neftçi” ilə cavab oyununa nikbin baxırıq. Əsas məsələ öz meydanımızda qol buraxmamaq idi ki, buna da nail olduq. Səfərdəki görüşdə məhsuldar heç-heçə sayəsində finala çıxa biləcəyik. Bundan əvvəlki mərhələdə “Karvan”la görüşdə daha çətin vəziyyətdə olduğumuz halda, istəyimizə çatdıq. Belə ki, öz meydanımızda 2:2 hesabı ilə heç-heçə etdiyimiz halda, səfərdə 1:0 hesabı ilə qələbə qazanaraq mərhələ adladıq. Bütün bunlar bizi “Neftçi” ilə aprelin 23-də keçiriləcəyimiz cavab yarımfinal görüşünə ruhlandırır”.
“Neftçi”nin baş məşqçisi Qurban Qurbanov isə ilk oyunda qeydə alınan nəticədən razı qalmayıb: “”MKT-Araz”la cavab görüşü öncəsi 0:0 hesabı bizim üçün heç də əlverişli deyil. Qol buraxdığımız halda, hesabı bərabərləşdirsək də, mərhələ adlaya bilmirik. Odur ki, bizə mütləq qələbə lazımdır”. /APA-Sport/