Döyüş növləri

Ana səhifə

Döyüş növləri

Vaqif Sadıqov: “Baş məşqçimizin məruz qaldığı cəza komandanı ağır vəziyyətdə qoydu”

04 may 2007 14:07 (UTC +04:00)

“Baş məşqçimizin məruz qaldığı cəza komandanı ağır vəziyyətdə qoydu”. Bu sözləri “Gənclərbirliyi” futbol klubunun vitse-prezidenti Vaqif Sadıqov “APA-Sport” agentliyinə açıqlamasında deyib. V.Sadıqov bildirib ki, Azərbaycan çempionatının son turunda “Qarabağ” komandası ilə qarşılaşmada “Gənclərbirliyi”nin baş məşqçisi İlye Karpa qırmızı vərəqə göstərilməsi ədalətli qərardır: “Hakimlər həmişə haqlıdır. Hesab edirəm ki, Karp əsəblərini cilovlamalı idi. Ancaq nəzərə almaq lazımdır ki, komandamızın yüksək dəstədəki yerini itirmək təhlükəsi ilə üzləşməsi Karpın psixoloji vəziyyətinə təsirsiz ötüşməyib”. Sumqayıt klubunun vitse-prezidenti İ.Karpın texniki zonadan uzaqlaşdırılmasının növbəti oyunda futbolçuların çıxışına mənfi təsir göstərməyəcəyini söyləyib: “Futbolçularımız növbəti turda Karpın texniki zonadan kənarda qalmasını hiss etdirməməyə çalışacaqlar. “Şahdağ”la səfər oyununda mütləq qənaətbəxş nəticə qazanmalıyıq”. V.Sadıqov, həmçinin, vurğulayıb ki, AFFA-ya ödəniləcək pul cəriməsi İ.Karpın əməkhaqqısından çıxılmayacaq.
Qeyd edək ki, İ.Karp mayın 2-də Sumqayıtda keçirilən “Gənclərbirliyi” - “Qarabağ” (0:3) matçında texniki zona qaydalarını pozduğundan qırmızı vərəqə alıb. AFFA Nizam-İntizam Komitəsi moldovalı məşqçini bir oyunluq cəzalandırmaqla yanaşı, 600 manat cərimələyib. /APA-Sport/