Döyüş növləri

Ana səhifə

Döyüş növləri

“Şahdağ” “Gənclərbirliyi” matçı qalmaqal yarandığından yarımçıq dayandırılıb

08 may 2007 16:29 (UTC +04:00)

Bu gün futbol üzrə Azərbaycan çempionatının XXIV turu çərçivəsində Qubada keçirilən “Şahdağ” “Gənclərbirliyi” matçında qalmaqal yaranıb. “APA-Sport” agentliyinin məlumatına görə, “Gənclərbirliyi”nin rəhbərliyi hakimlər briqadasının qərarlarına etiraz edərək, oyunu yarımçıq dayandırıblar. Belə ki, görüşün baş hakimi Anar Niyazov qarşılaşmanın sonlarında, Sumqayıt klubu hesabda 1:0 öndə olarkən “Şahdağ”ın lehinə iki penalti verib. 75-ci dəqiqədə təyin olunan ilk 11 metrlik cərimə zərbəsini “Şahdağ”ın hücumçusu Əhməd Ticani dəqiq yerinə yetirərək, hesabı bərabərləşdirib. Matçın üçüncü uzatma dəqiqəsində isə Valeh Kərimova qarşı kobudluğa görə, A.Niyazov növbəti dəfə “Gənclərbirliyi”nin qapısına penalti təyin edib. Lakin hakimin bu qərarını qonaqlar böyük etirazla qarşılayıblar. “Gənclərbirliyi”nin baş məşqçisi İlye Karp cəzalı olduğundan klubun vitse-prezidenti Vaqif Sadıqov məsələyə müdaxilə edərək, komandasını meydançadan çıxarıb.
Oyundan sonra Vaqif Sadıqov “APA-Sport” agentliyinə açıqlamasında baş verən qalmaqala belə münasibət bildirib: “Əsas etirazımız penalti ilə bağlı deyildi. Çünki həmin epizodu dəqiq görməmişdim. Biz penaltinin əlavə olunmuş vaxtdan sonra təyin edilməsinə etirazımızı bildirdik. Hakim 2 dəqiqə əlavə etmişdi. Amma penalti qərarı üçüncü uzatma dəqiqəsində verildi. Onsuz da həmişə “Gənclərbirliyi”ni cəzalandırırlar. Hakimlərin belə qərəzli qərarları isə klub rəhbərliyini və məşqçi korpusunu zərbə altına qoyur”.
“Şahdağ” klubunun prezidenti Bəybala Məmmədov isə “APA-Sport” agentliyinə açıqlamasında bildirib ki, baş hakim obyektiv qərar çıxarıb: “Fikrimcə, uzatma dəqiqələrində qayda pozuntusuna yol verilmişdi və hakimin penalti qərarı düz idi”. APA-Sport/