Döyüş növləri

Ana səhifə

Döyüş növləri

Fuad Əsədov: “Üzləşdirmə aktı AFFA-ya təqdim olunmasa, lisenziya “MKT-Araz” klubundan alınacaq”

23 may 2007 09:30 (UTC +04:00)

Azərbaycan Futbol Federasiyaları Assosiasiyasının (AFFA) baş katibi Fuad Əsədovun “APA-Sport” agentliyinə müsahibəsi

- Az öncə “MKT-Araz” klubunun lisenziya almaq şanslarının olmadığını bildirmişdiniz. Lakin AFFA-nın Lisenziyalaşdırma üzrə Apelyasiya Komitəsi bu komandaya lisenziya verilməsi qərarını qəbul edib. AFFA-nın “MKT-Araz”la bağlı qərarını dəyişməsini nə ilə izah edərdiniz?
- “MKT-Araz” rəhbərliyi AFFA-nın Apelyasiya Komitəsinə müraciət edib. Bu komitə müraciətə baxaraq, müvafiq qərar çıxarıb.
- Hərçənd, Apelyasiya Komitəsinə müraciət üçün klubların mayın 4-dən 14-dək vaxtları var idi. Mayın 15-də isə heç bir klubdan komitəyə məktub daxil olmadığını bildirdiniz.
- “MKT-Araz” Apelyasiya Komitəsinə mayın 8-də rəsmi məktub yollayıb. Sənədlərin qaydaya salınması üçün komitə tərəfindən İmişli komandasına mayın 20-dək möhlət verilib. “MKT-Araz” Pensiya Fonduna borcunu mayın 15-16-da ödəyib. Lazımi sənədlər mayın 18-də AFFA-ya təqdim olunub. Mayın 19-20-də istirahət günləri olduğundan, Apelyasiya Komitəsinin iclası keçirilməyib. Beləliklə, mayın 21-də günün ikinci yarısında 7 nəfərdən ibarət komissiya yığışaraq, “MKT-Araz”a lisenziya verib.
- Deyəsən, “MKT-Araz” AFFA-ya digər sənədlər də təqdim etməlidir. Hər halda, kluba iyunun 15-dək möhlət verilməsinin səbəbi olmalıdır.
- Elədir. “MKT-Araz” dövlətə borcunu qaytarıb. Lakin borcun ödənilməsini təsdiqləyən üzləşdirmə aktı hələ AFFA-ya çatdırılmayıb. Gələn ayın 15-dək həmin akt təqdim edilməsə, lisenziya “MKT-Araz”dan alınacaq.
- Mayın sonlarında AFFA rəhbərliyi FİFA-nın 57-ci konqresində iştirak edəcək. Toplantı çərçivəsində FİFA prezidenti Yozef Zepp Blatterlə xüsusi görüşünüz nəzərdə tutulubmu?
- Xeyr. Konqresdə yalnız FİFA prezidentliyinə seçkilər keçiriləcək. Yəni, Blatterlə ayrıca görüş planlaşdırılmır.
- Ola bilərmi ki, Avropa çempionatının seçmə mərhələsi çərçivəsində Azərbaycan və Ermənistan milli komandaları arasında keçiriləcək oyunların yeri ilə bağlı FİFA rəhbərliyinin köməyindən yararlanasınız?
- Bu məsələ barədə yekun qərarı iyunun 23-də UEFA İcraiyyə Komitəsi verəcək.
- UEFA bizim üçün qeyri-qənaətbəxş qərar çıxaracağı təqdirdə, AFFA hansı addımı atacaq?
- Ermənilər haqqında suallar kifayətdir! Tələsmək lazım deyil. UEFA qərar verdikdən sonra AFFA müvafiq addımlar atacaq.
- Milli komandamızın avqustun 22-də beynəlxalq yoldaşlıq görüşündə qarşılaşması üçün AFFA-nın Litva Futbol Federasiyasına göndərdiyi müraciətə cavab gəlib?
- Hələ yox.
- Adətən final görüşündən sonra ölkə kubokunu qalib komandaya AFFA prezidenti təqdim edir. Bu dəfə milli assosiasiya başçısı final matçında iştirak edə bilməyəcək. Ölkə kubokunu qalibə kim təqdim edəcək?
- Kubokun təqdimatı 1966-cı ildə SSRİ çempionatında bürünc medala layiq görülən “Neftçi” klubunun sağ qalan üzvlərinə tapşırılacaq. Başqa sözlə, kuboku qalibə Kazbek Tuayev, Valeri Hacıyev, Yaşar Babayev və Mübariz Zeynalov verəcək.
- Azərbaycan superkuboku uğrunda oyun təşkil olunacaqmı?
- Bu, klublardan asılıdır. Ötən il çempionla kubokun sahibi superkubok oyunundan imtina etdilər. Bu il superkubokda oynamaq hüququna yiyələn komandalar arasında razılıq əldə olunarsa, matçın təşkilatçılığına problem yoxdur. /APA-Sport/