Döyüş növləri

Ana səhifə

Döyüş növləri

İmanxan Sultani: “Ramin Musayev jurnalistlərə montaj edilən diski təqdim edərək, şou göstərib”

23 may 2007 12:40 (UTC +04:00)

“Ramin Musayev jurnalistlərə montaj edilən diski təqdim edərək, şou göstərib”. Bu sözləri “APA-Sport” agentliyinə açıqlamasında sabiq FİFA hakimi İmanxan Sultani bildirib. İ.Sultani “Neftçi”nin “Olimpik”ə məğlub olduğu görüşlə bağlı haqqında deyilənlərin həqiqətə uyğun olmadığını söyləyib: “Əlbəttə ki, diskdə yazılanlar montajdır. Mənim bu yazı haqda əvvəldən məlumatım var idi. Səsimin yazıldığını bilirdim. Telefonla danışdığım şəxslə dil xoşluğu edirdim. Guya, telefonla danışdığım həmin şəxsi hamı tanımır?” Mükafatla bağlı yayılan xəbərlərə gəlincə, İ.Sultani bildirib ki, bu, mümkün deyil: “30 min dollar mükafat istəməyimdən söhbət gedə bilməz. Başqa klubdan mükafat istəməyim də mümkün deyil. Telefon danışığında “müəllim” kimi nəzərdə tutulan şəxs Ramin Musayevdir. Ramin demişdi ki, təmiz oyun idarə etsən, mükafatın məndədir, sənə qonaqlıq verəcəm. Mənimlə telefonla danışan şəxsin kimlə oturub-durduğunu yaxşı bilirəm. Öz gözlərində tiri görməyib, başlarında tük axtarırlar”. İ.Sultani həmin qarşılaşmada “Neftçi”yə qarşı qərəzli hakim etmədiyini bildirib: “Meydanda “Neftçi”yə qarşı heç bir qərəzli qərar qəbul etməmişəm. Uduzublarsa, mən günahkaram? Hər iki qol oyunçularının səhvindən vurulub. Məgər mən komandanın daxili işinə qarışıram? “Olimpik” hesabı bərabərləşdirdiyi epizodda “Neftçi”nin qapısına künc zərbəsi təyin edilərkən, yan xətt hakimi dəqiq qərar çıxarıb. Mən uzaqdan həmin epizodu dəqiq görə bilmərəm. Bir də ki, “Neftçi”nin qapısına qol birbaşa künc zərbəsindən vurulmadı. Ramin Musayev niyə neçə vaxtdır bu diski göstərməyərək, indi bunu edir? Onlar mənimlə lağ-lağı etdi, mən də onlarla. Necə olur ki, “Neftçi” “Xəzər-Lənkəran”la oyunda qələbə qazandı amma məndən narazı olmadı. Hansı hüquq məcəlləsində telefon söhbətinə görə cəza var? Özü də telefon danışığında mənə zəng edən danışıb, mən iki-üç kəlmə demişəm. Konkret ad çəkməmişəm. Həmin şəxs məni döyəcəklərini deyərək, hədə-qorxu gəldi. Mövsümün sonudur də. Məsuliyyəti başqalarının üstünə ataraq, rəhbərlik qarşısında günahlarını yumaq üçün belə şayiələr çıxarıb, özlərini təmizə çıxarırlar”. /APA-Sport/