Döyüş növləri

Ana səhifə

Döyüş növləri

AFFA Respublika Prokurorluğuna müraciət edəcək

24 may 2007 13:33 (UTC +04:00)

AFFA “Neftçi” rəhbərliyinin sabiq FİFA referisi İmanxan Sultaniyə qarşı ittihamları əsasında Respublika Prokurorluğuna müraciət edəcək. Bu haqda “APA-Sport” agentliyinə AFFA prezidentinin köməkçisi Ələddin Ağayi məlumat verib. Ə.Ağayinin sözlərinə görə, bu gün milli assosiasiya rəsmiləri ilə İ.Sultani arasında görüş olub: “Bu gün Sultanini AFFA-ya dəvət edərək, ondan “Neftçi”nin irəli sürdüyü ittihamların nədən qaynaqlandığını soruşduq. Sultani özü haqqında deyilənləri təkzib edərək, bunları böhtan adlandırdı. Telefon danışığının montaj edildiyini söylədi”.
İ.Sultani isə məsələnin araşdırılması üçün AFFA prezidenti Ramiz Mirzəyevə məktub ünvanlayıb. AFFA rəhbərliyi məsələyə hüquq-mühafizə orqanlarını cəlb etmək qərarına gəlib. Bu məqsədlə İ.Sultaninin müraciəti, “Neftçi” tərəfindən təqdim olunan məktub və disk Respublika Prokurorluğuna göndəriləcək.
Qeyd edək ki, “Neftçi” Azərbaycan çempionatının XXV turu çərçivəsində “Olimpik”lə görüşdə İ.Sultaninin qərəzli idarəçiliyindən şikayətlənib. Oyundan sonra İ.Sultani ilə naməlum şəxsin telefon söhbəti diskə yazılıb. Həmin söhbətdə “Olimpik”lə matçda “Neftçi”nin qələbəsinə imkan verməyəcəyi halda, hakimə 30 min dollar mükafat vəd edildiyi məlum olub. /APA-Sport/