Döyüş növləri

Ana səhifə

Döyüş növləri

Ramin Quliyev “Neftçi” ilə bir illik müqavilə imzalayıb

08 iyun 2007 08:46 (UTC +04:00)

Futbol üzrə Azərbaycanın milli komandasının 26 yaşlı sol cinah müdafiəçisi Ramin Quliyevin “Neftçi” klubuna keçidi rəsmiləşib. Bu haqda “APA-Sport” agentliyinə məlumat verən R. Quliyev vaxtilə şərəfini qoruduğu “Neftçi” ilə artıq müqavilə bağladığını bildirib: “Neftçi” ilə bir illik müqavilə imzaladım. Amma anlaşmanın müddətinin uzadılması da mümkündür. Hər şey yaxşılığa doğru getsə, qarşıdakı mövsümün ortasında müqavilənin müddətini artırmaq istəyirəm”. Ötən ildən onunla maraqlanan “İnter”lə müqavilə imzalamaq ərəfəsində olduğunu söyləyən R. Quliyev son anda “Neftçi”yə üstünlük verdiyini bildirib: ““İnter” daha çox pul təklif etsə də, həyatda elə şeylər var ki, pulla ölçülmür. Hər halda “Neftçi” futbolumuzun flaqmanıdır”.
Qeyd edək ki, R.Quliyev 2004-cü ildən “Bakı”da çıxış edərək, bu klubun heyətində həm Azərbaycan çempionu olub, həm də Azərbaycan kubokunu qazanıb. Millinin müdafiəçisi “Bakı”dan gedişinin səbəbini isə belə izah edib: ““Bakı”da maddi məsələlər aşağı idi. Həm də artıq bu klubda gəncləşdirmə siyasəti aparılır. Bütün bunlar “Bakı”nı tərk etməyimə gətirib çıxardı. Ancaq gələcəkdə yenidən “Bakı”da oynamağım mümkündür”. /APA-Sport/