Döyüş növləri

Ana səhifə

Döyüş növləri

Ramiz Mirzəyev: “İsgəndər Cavadovun cəzalandırılmasından xəbərim yoxdur”

12 iyun 2007 15:36 (UTC +04:00)

“İsgəndər Cavadovun cəzalandırılmasından xəbərim yoxdur. Bunu ilk dəfə sizdən eşidirəm”. Bu sözləri “APA-Sport” agentliyinə eksklüziv açıqlamasında Azərbaycan Futbol Federasiyaları Assosiasiyasının (AFFA) prezidenti Ramiz Mirzəyev deyib. R. Mirzəyev AFFA-nın Nizam-İntizam Komitəsinin (NİK), eləcə də digər komitə və departamentlərin qərarları ilə mətbuat vasitəsilə tanış olduğunu bildirib: “NİK müstəqil fəaliyyət göstərir. Ümumiyyətlə, mən komitə və departamentlərin çıxardığı qərarlarla mətbuat vasitəsilə tanış oluram”. Federasiya prezidenti futbol veteranı İsgəndər Cavadovun AFFA-nın üzvü olan qurumlarda çalışmaqdan ikiillik məhrum edilməsi barədə geniş danışmaq istəməsə də, hər kəsin əməlinə görə məsuliyyət daşıdığını söyləyib: “Kimin hansı xidmətlər göstərməsi, hansı işlər görməsi başqa məsələdir. Bu, onu heç məsuliyyətdən azad etmir”.
Azərbaycan milli komandasının baş məşqçisi Şahin Diniyev də “APA-Sport” agentliyinə verdiyi açıqlamada NİK-in qərarından xəbərsiz olduğunu deyib: “İsgəndər Cavadovun mənim ünvanıma alçaldıcı ifadələr işlətməsindən xəbərim yoxdur. Mən belə məsələlərlə maraqlanmıram. Hərənin öz səviyyəsi var. Mən yığma komandanın çıxışına cavabdehlik daşıyıram.”
AFFA NİK-in sədri Tofiq Fətullayev isə “APA-Sport” agentliyinə açıqlamasında rəhbərlik etdiyi komitəyə R.Mirzəyev və Ş.Diniyevdən şikayət daxil olmadığını bildirib: “İsgəndər Cavadovun mətbuatda Ramiz Mirzəyev və Şahin Diniyevin şərəf və ləyaqətini alçaldan açıqlamalarını gördük, AFFA-nın işçiləri kimi, Nizam-İntizam Məcəlləsinin 61-ci maddəsinə uyğun olaraq onu cəzalandırdıq. Yəni, nə Ramiz Mirzəyev, nə də Şahin Diniyev komitəyə şikayət edib”. T. Fətullayev “Bəlkə İsgəndər Cavadovun sözləri Ramiz Mirzəyevlə Şahin Diniyevə xoşdur və onlar bu sözləri təhqiramiz ifadələr kimi qəbul etmirlər” sualına cavab verməyə çətinlik çəkib: “Hər halda, biz qərarımızı vermişik. Bu qərarı dəyişmək fikrimiz isə yoxdur”.
Qeyd edək ki, NİK İ.Cavadovun “APA-Sport” agentliyinə açıqlamasında R.Mirzəyevlə Ş.Diniyevin şərəf və ləyaqətini alçaltdığını əsas gətirərək, onun iki il ərzində AFFA-nın üzvü olan qurumlarda çalışmasına qadağa qoyub. /APA-Sport/