Döyüş növləri

Ana səhifə

Döyüş növləri

“İnter” daha üç futbolçunu transfer edib

13 iyun 2007 09:17 (UTC +04:00)

“İnter” klubunun hücumçu axtarışı müsbət nəticələnib. “İnter”in ukraynalı baş məşqçisi Valentin Xodukin “APA-Sport” agentliyinə açıqlamasında Xaqani Məmmədovun keçidini rəsmiləşdirdiklərini bildirib. Ötən mövsüm “Olimpik” klubunda çıxış edən 31 yaşlı X. Məmmədov “İnter”lə iki illik müqavilə imzalayıb. V. Xodukinin sözlərinə görə, komanda daha bir hücumçunun transferini reallaşdırıb. “İnter” Sumqayıtın “Gənclərbirliyi” klubunun 22 yaşlı hücumçusu Arif İsayevlə üç illik müqavilə imzalayıb. V. Xodukin ötən mövsüm “Gənclərbirliyi”ndə çıxış etmiş digər futbolçu R.Ağayevin də keçidini həll edərək, onunla iki illik müqavilə bağladıqlarını bildirib.
Qeyd edək ki, A. İsayevdən fərqli olaraq, 25 yaşlı R. Ağayev “Gənclərbirliyi”ndə icarə əsasında çıxış edib. Onun transfer hüquqları yüksək liqaya bu il vəsiqə qazanmış “Masallı” klubuna məxsusdur. 2005/06 mövsümündə “Xəzər-Lənkəran” klubunun şərəfini qorumuş R. Ağayev həm müdafiə, həm də yarımmüdafiənin sol cinahında çıxış edir.
Xatırladaq ki, “İnter” bunadək qapıçı Elxan Həsənov, müdafiəçilər Samir Abbasov, Ruslan Abbasov, Mahir Şükürov, sloveniyalı yarımmüdafiəçi Qoran Arnaut və hücumçu Ramin Nəsibovun keçidini həll edib. /APA-Sport/