Döyüş növləri

Ana səhifə

Döyüş növləri

Moldovalı və ukraynalı futbolçular İmişlinin “MKT-Araz” klubunda baxışdadır

19 iyun 2007 08:50 (UTC +04:00)

İmişlinin “MKT-Araz” klubu moldovalı və ukraynalı futbolçuları baxışa çağırıb. “APA-Sport” agentliyinin məlumatına görə, “MKT-Araz” “Bakı”nın İntertoto kubokundakı rəqibi, Moldovanın “Daçiya” klubunun 27 yaşlı sol cinah yarımmüdafiəçisi Yevgeni Boyçenkonu hazırlığa cəlb edib. “Daçiya” Y. Boyçenkonu “Bakı” ilə oyunlarda heyətində saxlamaq istəsə də, moldovalı klubunu dəyişməyi daha məqsədəuyğun sayıb. “MKT-Araz”ın sınayacağı digər moldovalı futbolçu isə avrokuboklarda artıq Azərbaycan klubuna qarşı oynayıb. Bu 2005-ci ildə Moldovanın “Nistru” klubunun heyətində UEFA kubokunda “Xəzər-Lənkəran”a qarşı çıxış etmiş və Kişinyovdakı oyunda qol vurmuş Andrey Matsuradır. Qeyd edək ki, “Xəzər-Lənkəran”la oyunlarda A. Matsura “Nistru”da atası Aleksandr Matsuranın rəhbərliyi altında çıxış edib. Hazırda Rusiyanın “Rubin” klubunda işləyən ata Matsura 1999-cu ildə UEFA kubokunda “Şəmkir”in rəqibi olan Ukraynanın “Krivbass” komandasının baş məşqçisi olub. Son iki ildə “Nistru”da oynayan və komandanın kapitanı olan Andrey Matsura isə vaxtilə Rusiyada Mahaçqalanın “Anji” və “Dinamo” klublarının da şərəfini qoruyub. Dayaq yarımmüdafiəçisi mövqeyində çıxış edən A. Matsura “MKT-Araz”la yollarını ayıran ukraynalı legioner Dmitri Parxomenkonun əvəzinə gətirilib. “MKT-Araz”a baxışa çağırılan üçüncü moldovalı futbolçu Vyaçeslav Sofronun sonuncu klubu isə Qazaxıstanın “İrtış” komandası olub. “MKT-Araz”ın baxışa çağırdığı digər üç legioner isə ukraynalıdır. 26 yaşlı hücumçu Vladimir Posolatyev Ukraynanın “Tavriya”, 26 yaşlı sol cinah yarımmüdafiəçisi Sergey Seryoqinlə 21 yaşlı hücuma meylli yarımmüdafiəçi İqor Şolin “Karpatı” klubunda çıxış edib. İ. Şolin Ukraynanın 19 yaşlılardan ibarət yığma komandasının sabiq üzvüdür.
Qeyd edək ki, hazırda Qəbələdə hazırlıq keçən “MKT-Araz” bu legionerlərlə yanaşı, 27 yaşlı bosniyalı hücumçu Alen Başiçi də sınayır. Bu legioner son illərdə Almaniyada çıxış edib, sonuncu klubu isə birinci dəstədə çıxış edən “Kikker Oferbax” olub. /APA-Sport/