Döyüş növləri

Ana səhifə

Döyüş növləri

Azərbaycan və Ermənistan yığmalarının oyunları ilə bağlı yekun qərar verəcək UEFA İcraiyyə Komitəsinin toplantısının gündəliyi açıqlanıb

20 iyun 2007 11:19 (UTC +04:00)

Avropa çempionatının seçmə mərhələsində Azərbaycan və Ermənistan milli komandaları arasında oyunlarla bağlı qərar verəcək UEFA İcraiyyə Komitəsinin (İK) toplantısının gündəliyi açıqlanıb. “APA-Sport” agentliyinin məlumatına görə, Hollandiyanın Herenven şəhərinin “Abe Lenstra” stadionunda baş tutacaq toplantının gündəliyinə 7 məsələ daxil edilib. İK üzvləri 2010-cu ildə keçiriləcək dünya çempionatının Avropa üzrə seçmə mərhələsinin formatı, 2007-2009-cu illərdə UEFA komitələrinin tərkibinin təsdiqlənməsi, 2009-cu ildə UEFA-nın XXXIII konqresinin keçiriləcəyi yer, 2007-2011-ci illərdə UEFA-nın əməkdaşlıq edəcəyi təşkilatlar, məşqçilərin ixtisaslarının artırılmasına dair UEFA-nın konvensiyasına yeni üzvlərin qəbulu, hakimlərlə bağlı UEFA-nın konvensiyasına ilk 10 assosiasiyanın üzvlüyə qəbul olunması məsələlərinə baxacaqlar. İclasda, həmçinin, futbol oyunlarının keçirilməsi zamanı İsrailin paytaxtı Təl-Əviv şəhəri ətrafında təhlükəsizliyə dair müzakirələr aparılacaq. Azərbaycan-Ermənistan oyunlarının keçiriləcəyi yerlə bağlı məsələ gündəliyə daxil edilməsə də, İK üzvlərinin bu məsələni də müzakirə edərək, yekun qərar verəcəkləri gözlənilir. Belə ki, UEFA-nın mətbuat katibi Uilyam Qalyard da “APA-Sport” agentliyinə açıqlamasında bu toplantıda Azərbaycan və Ermənistanın yığmalarının oyunlarına aydınlıq gələcəyini bildirib. İK-nın iclası iki gün çəkəcək. İyunun 22-də Bakı vaxtı ilə saat 17:00-da başlanacaq toplantı 20:30-da başa çatacaq. Ertəsi gün isə iclas işini saat 12:00-dan 15:00-dək davam etdirəcək. İclasdan dərhal sonra “Trip” zalında mətbuat konfransı keçiriləcək. /APA-Sport/