Döyüş növləri

Ana səhifə

Döyüş növləri

Qadın futbolçular arasında baş vermiş insidentlə bağlı AFFA-nın Nizam-İntizam Komitəsi sabah qərar çıxaracaq

21 iyun 2007 09:46 (UTC +04:00)

Qadın futbolçular arasında Azərbaycan çempionatının son turunda baş verənlərlə bağlı AFFA-nın Nizam-İntizam Komitəsi sabah qərar verəcək. Bu haqda “APA-Sport” agentliyinə məlumat verən Qadın Futbol Federasiyasının prezidenti Asim Xudiyevin sözlərinə görə, hakim və inspektorların təqdimatları bu gün Nizam-İntizam Komitəsinə veriləcək. Federasiya prezidenti bildirib ki, çempionatın VI turunun matçları müxtəlif səbəblərdən yarımçıq dayandırılıb: ““Ruslan-93”-“Səbuhi” görüşündə futbolçular arasında dava düşüb. Nəticədə “Səbuhi” komandası oyunu davam etdirməkdən boyun qaçırıb. “Vətən” klubu isə “Neftçi” ilə qarşılaşmanın ikinci hissəsində meydana çıxmaqdan imtina edib”. A. Xudiyev rəhbərlik etdiyi qurumun “Ruslan-93” komandasını çempion etməyə çalışdığı barədə yayılan söz-söhbətləri rədd edib: “Bunlar şayiədir. Federasiya rəhbərliyi hansısa komandanı çempion etmək marağında deyil. Fikrimcə, təxminən iki ay davam edən yarış tam obyektiv keçib”.
Qeyd edək ki, VI turda qızıl medallar uğrunda əsas mübarizə eyni xalları olan “Ruslan-93”-lə “Neftçi” arasında gedib. Topların daha yaxşı fərqinə görə yarış cədvəlinin ilk pilləsində qərarlaşan “Ruslan-93” son turda qələbə qazanacağı təqdirdə, çempion tituluna yiyələnəcəkdi. VI turun matçları yarımçıq qalan anda “Ruslan-93” 2:0, “Neftçi” isə 11:0 hesabı ilə öndə olub. /APA-Sport/