Döyüş növləri

Ana səhifə

Döyüş növləri

Qadınlardan ibarət “Ruslan-93” klubu Azərbaycan çempionatının qalibi elan olunub

22 iyun 2007 11:41 (UTC +04:00)

Qadın futbolçulardan ibarət “Ruslan-93” klubu III Azərbaycan çempionatının qalibi elan olunub. “APA-Sport” agentliyinin məlumatına görə, paytaxt komandasının bu titulu qazanması AFFA-nın Nizam-İntizam Komitəsinin (NİK) bu gün keçirilmiş iclasında rəsmiləşib. Toplantıda qadın futbolçular arasında ölkə çempionatının son turunda baş verən insident müzakirəyə çıxarılıb. Nəticədə “Ruslan-93”-“Səbuhi” oyunun yarımçıq dayandırılmasında günahkar hesab edilən qonaq komandaya texniki məğlubiyyət verilib. “Ruslan-93”-ün üzvləri Yelena Şapavalenko və Gözəl Zakirova, eləcə də “Səbuhi”dən Aytən Mehbalıyeva və Tünzalə Süleymanova rəqibi bilərəkdən vurduğundan iki oyunluq diskvalifikasiya edilib. Hər iki komanda 200 manat cərimələnib. “Səbuhi” meydanı özbaşına tərk etdiyinə görə, əlavə 500 manat cəriməyə məruz qalıb.
Yarımçıq qalan digər matç - “Neftçi”-“Vətən” görüşünün nəticəsi isə olduğu kimi saxlanılıb (11:0). “Vətən” fasilədən sonra oyunu davam etdirməkdən boyun qaçırdığı üçün 500 manat cərimə edilib. Baş məşqçi Zamin Əsədullayev isə komandanı bu işə vadar etdiyindən barəsində ciddi tədbirlər görülməsi qərara alınıb. NİK-in qərarına əsasən, “Ruslan-93” 15 xalla tarixində ilk dəfə çempionluq tituluna yiyələnib. Eyni xala malik “Neftçi” ikinci yeri tutub. “Neftçi” şəxsi göstəricilər baxımdan “Ruslan-93”-dən irəlidə olsa da, top fərqinə görə gümüş medallarla kifayətlənməli olub. Bu komandanın çempion olması üçün 12 qol çatmayıb. Qızıl medallara sahib çıxan “Ruslan-93” Azərbaycanı UEFA kubokunda təmsil edəcək. /APA-Sport/