Döyüş növləri

Ana səhifə

Döyüş növləri

“Neftçi” klubunun prezidenti: “Komandamız ölkə çempionatında çıxışını dayandıra bilər”

27 iyun 2007 10:05 (UTC +04:00)

Qadın futbolçulardan ibarət “Neftçi” futbol klubu AFFA-dan UEFA-ya şikayət edib. Bu haqda “APA-Sport” agentliyinə məlumat verən komandanın prezidenti Azər Rəhimovun sözlərinə görə, şikayət məktubunda “Ruslan-93”-ün qanunsuz yolla Azərbaycan çempionluğunu qazanmasına etiraz ifadə olunub. A. Rəhimov bildirib ki, rəhbərlik etdiyi klub şəxsi görüşlərdə “Ruslan-93”-ü qabaqlasa da, ikinci yeri tutub: “Komandamız “Ruslan-93”-lə eyni miqdarda xal toplayıb. Çempionatın Əsasnaməsinə görə, biz çempion olmalı idik. Çünki şəxsi görüşlərdə rəqibimizi üstələmişdik. Lakin AFFA top fərqini əsas götürərək, “Ruslan-93”-ü qızıl medallara layiq görüb”. “Neftçi”nin prezidenti vurğulayıb ki, UEFA müsbət qərar çıxarmayacağı təqdirdə, komanda növbəti ölkə çempionatında iştirak etməyəcək: “Biz UEFA-nın müvafiq komitəsindən bu məsələnin obyektiv araşdırılmasını xahiş etmişik. UEFA müsbət qərar verməsə, “Neftçi” qarşıdakı çempionata qatılmayacaq. Ümumiyyətlə, komandanın ləğv olunması gündəmə gələcək”.
Azərbaycan Qadın Futbol Federasiyasının prezidenti Asim Xudiyev isə “APA-Sport” agentliyinə açıqlamasında “Ruslan-93”-ün qanuni ölkə çempionu olduğunu deyib: “Biz Əsasnaməni yarışdan öncə iştirakçılara göndərmişdik. Əsasnamədə göstərilib ki, eyni miqdarda xal toplayan komandalardan üstünlük top fərqi yaxşı olan tərəfə verilir. “Ruslan-93” qanuni çempion olduğundan ölkəmizi UEFA kubokunda təmsil edəcək”. AFFA qitə miqyaslı yarışda mübarizə aparacaq “Ruslan-93”-ün adını iyunun 25-də UEFA-ya artıq təqdim edib. UEFA kubokunun püşkü iyulun 5-də atılacaq. /APA-Sport/