Döyüş növləri

Ana səhifə

Döyüş növləri

Qurban Qurbanov: “Oyununu izlədiyimiz “Rid” klubundan çəkinmirik”

12 iyul 2007 13:33 (UTC +04:00)

“Rid” Avstriya çempionatının ilk turunda məğlub olsa da, yaxşı təsir bağışladı”. Bu sözləri “APA-Sport” agentliyinə açıqlamasında hazırda Avstriyada təlim-məşq toplantısında olan “Neftçi” klubunun baş məşqçisi Qurban Qurbanov deyib. Çalışdırıcı komandasının UEFA kubokunun birinci təsnifat mərhələsindəki rəqibi “Rid” klubunun ölkə birinciliyi çərçivəsində öz meydanında “Mattersbruq”a 1:2 hesabı ilə uduzduğu qarşılaşmada xal qazanmağa layiq olduğunu vurğulayıb: “Rəqibimiz bu oyunda bir xal qazana bilərdi. İkinci hissədə hesab bərabər idi. Ancaq almaniyalı hücumçu Karsten Yanker qələbə topunu vurmaqla, rəqibimizi məğlubiyyətlə başlamağa məcbur etdi. Məğlubiyyətdən qaçmağa çalışan “Rid” 1:3 hesabı ilə də uduza bilərdi. Uğursuzluğa baxmayaraq, “Rid”in güclü rəqib olduğunun canlı şahidi olduq. Futbolçular fiziki cəhətdən çox güclüdürlər. Ucaboylu futbolçuları olan “Rid” hava mübarizələrində yaxşı oyun nümayiş etdirir”. Q.Qurbanovun sözlərinə görə, “Rid” klubu rəsmilərinin “Neftçi”nin oyunlarını izləməsindən xəbərdardır: “Düşünmürəm ki, rəqib komanda oyununu izlədiyimiz üçün bütün “kart”ları açmayaraq, bilərəkdən məğlub oldu. Hər halda, çempionata qələbə ilə başlamaq istəyirdi. Özü də ilk görüş Rid şəhərində keçirilirdi. Sadəcə, “Rid”in rəqibi güclü idi, ötən çempionatı 3-cü yerdə başa vurub. Artıq “Rid”in oyun üslubuna, hansı taktiki sxemlə oynadığını bilirəm. Hazırlığımızda buna nəzərə alacağıq. Oyununu izlədiyimiz “Rid”dən çəkinmirik. Eyni zamanda, rəqibin öz meydanında uduzmasından arxayınlaşmadıq”. /APA-Sport/