Döyüş növləri

Ana səhifə

Döyüş növləri

İordaniya Azərbaycanla yoldaşlıq görüşü keçirməkdən imtina edib

16 iyul 2007 09:52 (UTC +04:00)

İordaniya Futbol Federasiyası AFFA-nın avqustun 22-də beynəlxalq yoldaşlıq görüşü keçirmək təklifini qəbul etməyib. Bu haqda “APA-Sport” agentliyinə məlumat verən AFFA-nın Milli Komandalar Departamentinin rəisi Bəhruz Əsgərovun sözlərinə görə, iordaniyalılar yoldaşlıq görüşündən imtinanın səbəbini bildirməyiblər. B.Əsgərov vurğulayıb ki, İordaniyanın imtinasından sonra Çernoqoriya yığmasına dəvət göndərilməsi nəzərdə tutulub: “İordaniyanın həm əsas, həm də 21 yaşlılardan ibarət yığmasını Bakıya dəvət etmişdik. Bu komandaların təklifimizdən imtinasının səbəbi məlum deyil. Yəqin ki, bu gün Çernoqoriya Futbol Federasiyana faks göndərəcəyik”. Bu ilin mayında FİFA və UEFA-nın üzvü olan Çernoqoriya yaxın bir ildə rəsmi yarışlarda iştirak etməyəcək. AFFA bu boşluğu nəzərə alaraq, Çernoqoriyanın futbol qurumuna təklifini çatdıracaq. B.Əsgərov, həmçinin sentyabrın 12-də yoldaşlıq oyunu keçirmək üçün Birləşmiş Ərəb Əmirliklərinə göndərilən dəvətə hələ cavab gəlmədiyini deyib.
Qeyd edək ki, İordaniya avqustun 22-də Bakıda Azərbaycanla qarşılaşmaqdan imtina edən üçüncü komandadır. Bundan öncə Litva və Makedoniya Futbol Federasiyaları da analoji addım ataraq, AFFA-nın təklifini rədd edib. /APA-Sport/