Döyüş növləri

Döyüş növləri

AFFA yoldaşlıq görüşü keçirmək üçün Maltaya dəvət göndərib

17 iyul 2007 10:21 (UTC +04:00)

AFFA avqustun 22-də yoldaşlıq görüşü keçirmək üçün Malta Futbol Assosiasiyasına dəvət göndərib. Bu barədə “APA-Sport” agentliyinə məlumat verən AFFA-nın Milli Komandalar Departamentinin rəisi Bəhruz Əsgərovun sözlərinə görə, Maltanın əsas və 21 yaşlılardan ibarət yığmalarına yoldaşlıq matçı təklif olunub: “Olimpiya yığmamız üçün də rəqib axtarırıq. Bu məqsədlə paralel olaraq, Maltanın 21 yaşlılardan ibarət komandasına da təklifimizi çatdırmışıq. Maltalılarla həm Bakıda, həm də səfərdə qarşılaşmağa hazırıq”. B.Əsgərov Çernoqoriya ilə aparılan danışıqların nəticəsiz qaldığını deyib. Buna Çernoqoriya yığmasının avqustun 22-də başqa komanda ilə yoldaşlıq görüşü keçirməyə razılıq verməsi səbəb olub. Çernoqoriyadan öncə Litva, Makedoniya və İordaniya da AFFA-nın təklifini rədd edib.
Qeyd edək ki, Malta FİFA-nın son reytinq siyahısında Azərbaycandan 8 pillə aşağıda, 117-ci yerdə qərarlaşıb. Azərbaycan və Malta milli komandaları indiyədək 3 dəfə qarşılaşıblar. Maltanın paytaxtı Valettanın “Ta Qali” stadionunda keçirilən hər üç qarşılaşmada yığmamız məğlubiyyətlə üzləşib. Futbolçularımız maltalılara 1994-cü il aprelin 19-da 0:5, 2000-ci il fevralın 6-da 0:3, 2002-ci il aprelin 17-də isə 0:1 hesabı ilə uduzublar. /APA-Sport/