Döyüş növləri

Döyüş növləri

Sentyabrın 12-də Bakıda Azərbaycan və Gürcüstan milliləri arasında yoldaşlıq görüşü keçiriləcək

19 iyul 2007 12:28 (UTC +04:00)

Bu haqda “APA-Sport” agentliyinə məlumat verən AFFA-nın Milli Komandalar Departamentinin rəisi Bəhruz Əsgərovun sözlərinə görə, Gürcüstan Futbol Federasiyası görüşün keçirilməsinə rəsmi razılıq verib: “Gürcülər təklifimizə tezliklə cavab verdilər. Artıq bu gün Gürcüstan Futbol Federasiyasından yoldaşlıq görüşü keçirməyə razı olduqları barədə faks almışıq”. B. Əsgərov bildirib ki, Gürcüstanla matç Tofiq Bəhramov adına Respublika stadionunda baş tutacaq. AFFA UEFA-nın Avropa çempionatının seçmə mərhələsində sentyabr 8-də və 12-də Ermənistanla nəzərdə tutulan qarşılaşmaların keçirilməməsi barədə çıxardığı qərardan sonra rəqib axtarışına başlayıb. Sentyabrın 12-də yoldaşlıq görüşü keçirmək təklif edilən ilk ölkə - Birləşmiş Ərəb Əmirliklərinə (BƏƏ) göndərilən məktuba hələ cavab gəlməyib. B. Əsgərov vurğulayıb ki, BƏƏ müsbət cavab gələrsə, görüşün sentyabrın 8-nə təyin olunacağı istisna deyil. Həmçinin, Malta da AFFA-nın avqustun 22-də yoldaşlıq oyunu keçirmək təklifinə münasibət bildirməyib. Qeyd edək ki, Azərbaycan yığması tarixində ilk oyununu məhz Gürcüstana qarşı keçirib. 1992-ci il sentyabrın 17-də Gürcaani şəhərində baş tutan görüşdə milli komandamız 3:6 hesabı ilə məğlub olub. Bundan başqa, futbolçularımız gürcülərlə 1993-cü il mayın 25-də və 1998-ci il avqustun 12-də Gəncədə (hər iki oyun - 1:0), 2000-ci il iyunun 4-də Bakıda (0:0) və 2001-ci il mayın 9-da Kutaisidə (0:1) qüvvəsini sınayıb. /APA-Sport/