Döyüş növləri

Döyüş növləri

“Neftçi” “Rid” klubuna məğlub olub

20 iyul 2007 08:27 (UTC +04:00)

“Neftçi” UEFA kubokunun birinci təsnifat mərhələsində Avstriyanın “Rid” klubu ilə ilk oyunda uğursuzluğa düçar olub. “APA-Sport” agentliyinin məlumatına görə, dördqat Azərbaycan çempionu “Rid” ilə səfərdə keçirdiyi görüşdə 1:3 hesabı ilə uduzub. Qarşılaşmanın 2-ci dəqiqəsində Herviq Dreşelin vurduğu qoldan sonra hesabda geri düşən komandamız tezliklə tarazlığı bərpa edib. 14-cü dəqiqədə Aqil Məmmədovun ötürməsindən sonra qapıçı ilə təkbətək çıxan Samir Əliyev bərabərlik qolunu vurub. Bu, S.Əliyevin “Neftçi”nin heyətində avrokuboklarda ilk, ümumiyyətlə, vurduğu ikinci qol olub. Avstriyalılar əzmkarlıq nümayiş etdirərək son beş dəqiqədə iki qol vurmağı bacarıb. 87-ci dəqiqədə Evald Brenner, bundan üç dəqiqə sonra Hamdi Salihi komandamızın qapısından iki top keçiriblər. “Neftçi” məğlub olmaqla, xoşagəlməz ənənəsini davam etdirib. Belə ki, “Neftçi” indiyədək UEFA kubokunda səfər oyunlarında bir qayda olaraq uduzur. Komandalar arasında cavab görüşü avqustun 2-də Tofiq Bəhramov adına Respublika stadionunda keçiriləcək. /APA-Sport/