Döyüş növləri

Döyüş növləri

“Xəzər-Lənkəran” Xorvatiyaya iki futbolçusunu aparmayacaq

20 iyul 2007 12:23 (UTC +04:00)

“Xəzər-Lənkəran”ın və Azərbaycan milli komandasının 20 yaşlı hücumçusu Vüqar Nadirov Çempionlar Liqasının ilk təsnifat mərhələsində Xorvatiyanın “Dinamo” klubunu ilə cavab oyununu da buraxacaq. “APA-Sport” agentliyinin məlumatına görə, zədəli olduğundan “Dinamo” ilə Bakıda keçirilən oyunda iştirak etməyən V. Nadirovun zədə problemi həll olunmadığına görə, o, Xorvatiyaya aparılmayacaq. Komandamız cavab görüşünü keçirəcəyi Xorvatiyanın paytaxtı Zaqrebə kapitan Emin Quliyevi də aparmayacaq. “Dinamo” ilə ilk oyunda rəqibi vurduğuna görə qırmızı vərəqə alaraq meydandan qovulan E.Quliyev cəzalıdır. V. Nadirovla E.Quliyevin yoxluğunda “Xəzər-Lənkəran” səfərə 18 futbolçu ilə yollanacaq. Qısa müddətli istirahətdən sonra bu gün bir araya gələn “Xəzər-Lənkəran” səhər məşqini keçib və axşamkı hazırlığı saat 19:30-da başlanacaq. Zaqrebə yollananadək Bakıda üç gün hazırlıq keçəcək “Xəzər-Lənkəran” məşqlərini “Dinamo” ilə oynadığı Tofiq Bəhramov adına Respublika stadionunda keçirəcək. Sabah və birigün bir məşq prosesinin olması nəzərdə tutulub. Sabahkı məşq də 19:30-da başlanacağı halda, iyulun 22-də olan hazırlığın başlanma saatı dəqiqləşməyib. Belə ki, komandanın səfərə yollanması ilə əlaqədar məşqçilər korpusu Bakıda son məşqin keçirilmə vaxtını hələ müəyyənləşdirməyiblər. Qeyd edək ki, “Xəzər-Lənkəran” Zaqrebə iyulun 22-dən 23-ə keçən gecə 03.30-da çarter reysilə yollanacaq. /APA-Sport/