Döyüş növləri

Döyüş növləri

Ramiz Məmmədov Roberto Karlosu qabaqlayıb

23 iyul 2007 11:04 (UTC +04:00)

Beynəlxalq Futbol Tarixi və Statistikası Federasiyası məhsuldar müdafiəçilərin siyahısını dərc edib. “APA-Sport” agentliyinin məlumatına görə, Qəbələnin “Gilan” klubunun baş məşqçisi olan sabiq müdafiəçi Ramiz Məmmədov 80 nəfərlik siyahıda 33-cü pillədə qərarlaşıb. Azərbaycan milli komandasının sabiq futbolçusu olan 39 yaşlı R.Məmmədov 1992-2005-ci illər aralığında müxtəlif klubların heyətində keçirdiyi 285 oyuna 64 qol vurub. Həmvətənimiz bu sayda qol vuran “Qalatasaray”ın və Rumıniya yığmasının sabiq müdafiəçisi, artıq futbolçu karyerasını başa vuran Georgi Popeskunu bir pillə qabaqlayıb. R.Məmmədovun 472 dəfə meydana çıxan G.Popesku ilə müqayisədə az oyun keçirməsi üstün sayıldığından, o tanınan rumıniyalı həmkarından öndə yer alıb. Braziliya yığmasının heyətində dünya çempionluğunu qazanan 34 yaşlı müdafiəçi Roberto Karlos R.Məmmədovdan az qol vurduğu üçün həmyerlimizdən geridə qalıb. Yaxınlarda “Real”dan “Fənərbaxça” klubuna keçən R.Karlos 526 oyuna 61 qol vurub. Siyahıya isə 533 oyuna 193 qol vuran hollandiyalı, hazırda PSV klubuna çalışdıran Ronald Kuman başçılıq edir. /APA-Sport/