Döyüş növləri

Döyüş növləri

Qoqi Kavtaradze: “Azərbaycanla Gürcüstanın Bakıda yoldaşlıq görüşü keçirməsi ilə bağlı hələ razılıq əldə olunmayıb”

24 iyul 2007 08:40 (UTC +04:00)

“Azərbaycanla Gürcüstanın sentyabrın 12-də Bakıda yoldaşlıq görüşü keçirməsi ilə bağlı hələ razılıq əldə olunmayıb”. Bu sözləri “APA-Sport” agentliyinin Gürcüstan bürosuna Gürcüstan Futbol Federasiyasının (GFF) vitse-prezidenti Qoqi Kavtaradze deyib. AFFA-dan təklif aldıqlarını təsdiqləyən GFF rəsmisi yoldaşlıq matçı oynanılacağı barədə danışmağın tez olduğunu bildirib: “UEFA Ermənistanla Avropa çempionatının seçmə mərhələsi çərçivəsində oyunları ləğv etməsindən sonra Azərbaycanın rəqib axtardığından xəbərdarıq. Biz həqiqətən də Azərbaycandan təklif almışıq. Ancaq Bakıya gedib-getməyəcəyimiz barədə konkret söz deməyə çətinlik çəkirəm. Federasiyamız hələ qəti qərara gəlməyib. Həm də Gürcüstan yığmasının yoxlama oyunlarının planını baş məşqçi Klaus Topmöller tərtib edir. Topmöller istəyərsə, Azərbaycanla qarşılaşacağıq”. Q.Kavtaradze Gürcüstan yığmasının avqustun 22-də Lüksemburqla yoldaşlıq görüşündə qüvvəsini sınayacağını, sentyabrın 8-də isə Ukrayna ilə Avropa çempionatının seçmə mərhələsi çərçivəsində üz-üzə gələcəyini vurğulayıb. O, beşqat dünya çempionu Braziliya ilə yoldaşlıq oyununun maddi məsələlərə görə baş tutmadığını söyləyib: “Braziliya futbol rəsmiləri yığmanın Tbilisiyə gəlməsi üçün bizdən külli miqdarda pul tələb etdilər. Onlarla yoldaşlıq oyunu keçirmək variantını gələn il yenidən müzakirə edəcəyik”.
AFFA-nın Milli Komandalar Departamentinin rəisi Bəhruz Əsgərov isə “APA-Sport” agentliyinə açıqlamasında GFF-dən rəsmi razılıq məktubu aldıqlarını deyib: “Gürcüstanlılar hələ qəti qərara gəlməyiblər? Axı, onların göndərdiyi faks bu dəqiqə stolumun üstündədir. Gürcüstan milli komandası sentyabrın 12-də Bakıya gəlməyə rəsmən razılıq verib”. /APA-Sport/