Döyüş növləri

Döyüş növləri

Rasim Kara: “Türkiyədə Azərbaycan futboluna maraq artıb”

24 iyul 2007 13:30 (UTC +04:00)

“Türkiyədə Azərbaycan futboluna maraq artıb. Azərbaycan klublarının avrokuboklarda çıxışı həmvətənlərimin diqqət mərkəzində idi”. Bu sözləri “APA-Sport” agentliyinə açıqlamasında “Qarabağ” klubunun baş məşqçisi Rasim Kara deyib. Türkiyəli çalışdırıcı komandasının hazırlıq prosesi keçdiyi vaxtda “Xəzər-Lənkəran”, “Neftçi” və “MKT-Araz”ın avrokuboklarda oyunlarını izlədiyini söyləyib: “Azərbaycan klublarının qitə miqyaslı turnirlərdə ilk görüşlərini televiziyadan izlədim. “Xəzər-Lənkəran”ın Xorvatiyanın “Dinamo” klubu ilə Bakıdakı matçında qeydə alınan nəticəyə çox üzüldüm. “Xəzər-Lənkəran” güclü rəqiblə qarşılaşmada hesabda irəli çıxdığı halda, üstünlüyünü tezliklə əldən verdiyinə və ardınca kapitan Emin Quliyev meydandan qovulduğuna görə çox təəssüfləndim. “MKT-Araz”ın “Qrotslin” klubuna öz meydanında uduzmamağı, heç-heçə etməsi mərhələ keçmək şansını saxlayır. “Neftçi” isə “Rid” ilə səfər matçında yaxşı oyun nümayiş etdirsə də, son dəqiqələrdə diqqətsizlik ucbatından iki qol buraxdı”. Klublarımızın ilk görüşlərində yaxşı oyun nümayiş etdirdiyini deyən R.Kara mərhələ adlamaq şanslarının bitmədiyini qeyd edib: “Xəzər-Lənkəran”ın “Dinamo”nu səfərdə yenməsi çox çətin olacaq. Ancaq keçmiş komandamız səfərdə də 1:1 edib, penaltilər seriyasında mərhələ adlayacağını düşünürəm. “MKT-Araz”ın “Xəzər-Lənkəran”dan fərqli, öz meydanında qol buraxmamağı üstün cəhətdir. Yəni, səfərdə məhsuldar heç-heçə sayəsində mərhələ keçməyi mümkün variant sayıram. “Neftçi” klubunun isə Bakıda 2:0 hesablı qələbə qazanıb, mərhələyə keçəcəyinə inanıram”. /APA-Sport/