Döyüş növləri

Döyüş növləri

Əli Hüseynov: “Bəlkə də hakimlərlə bağlı işin daha yaxşı təşkili üçün istefaya göndərildim”

24 iyul 2007 15:41 (UTC +04:00)

“İnsan ölümə də hazır olmalıdır. Bu mənada tutduğum vəzifədən azad edilməyimi çox yaxşı qarşıladım. AFFA rəhbərliyi məsləhət bilibsə, deməli, belə lazımdır”. Bu sözləri “APA-Sport” agentliyinə açıqlamasında AFFA-nın Hakimlər Komitəsinin sabiq sədri Əli Hüseynov deyib. AFFA İcraiyyə Komitəsinin iyulun 20-də keçirilən iclasında istefaya göndərilən Ə.Hüseynov bu qərarın gözlənilməz olmadığını bildirib: “Bəlkə də AFFA rəhbərliyi hakimlərlə bağlı işi daha yaxşı təşkil etmək üçün məni istefaya göndərdi. Hər halda, istefa qərarını normal qarşıladım”. Sabiq sədr istefaya göndərilməsindən sonra bir qrup hakimin qiyama qalxmasını qeyri-qanuni addım sayıb: “AFFA rəhbərliyinin keçirdiyi iclası yarımçıq tərk edən və mənim istefama etirazını bildirən hakimlərin hərəkətinə qarşı çıxdım. Çünki onların hərəkətini qeyri-qanuni qiymətləndirirdim. Buna görə də, onların hamısını iclasa qaytardım”. Ə.Hüseynov xələfi Murad Məmmədovun perspektivi barədə geniş danışmaq istəməyib: “Murad Məmmədovun işinin öhdəsindən gəlib-gəlməyəcəyi haqda indidən heç nə demək olmaz. İşə başladıqdan sonra onun fəaliyyətini qiymətləndirmək mümkün olacaq”.
Qeyd edək ki, Ə.Hüseynov son iki ildə AFFA-nın Hakimlər Komitəsinin sədri vəzifəsində çalışıb. O, Hakimlər Komitəsindən uzaqlaşdırılsa da, AFFA-nın Texniki Tərəqqi və İnkişaf Departamentinin rəisi vəzifəsində fəaliyyətini davam etdirəcək. /APA-Sport/