Döyüş növləri

Döyüş növləri

“Xəzər-Lənkəran” Çempionlar Liqasında mübarizəni dayandırıb

25 iyul 2007 08:31 (UTC +04:00)

“Xəzər-Lənkəran” Çempionlar Liqasında (ÇL) mübarizəni ilkin təsnifat mərhələsində dayandırıb. “APA-Sport” agentliyinin məlumatına görə, “Xəzər-Lənkəran” Xorvatiyanın “Dinamo” klubu ilə cavab görüşündə 1:3 hesabı ilə məğlub olub. Bakıda keçirilən ilk oyunda olduğu kimi, hesabı “Xəzər-Lənkəran” açıb. Komandanın braziliyalı yeni transferi Junior Osvaldonun 16-cı dəqiqədə 35 metr məsafədən yerinə yetirdiyi cərimə zərbəsi qarşısıalınmaz olub. Lakin xorvatiyalılar ikinci hissənin əvvəlində tarazlığı bərpa edib. “Dinamo”nun baş məşqçisi Branko İvankoviç fasilədən dərhal sonra Xorvatiya millisinin sabiq üzvü Davor Vuqrinetsi meydana buraxıb. Bakıdakı oyunun iştirakçısı olmayan “Trabzonspor”un keçmiş hücumçusu 56-cı dəqiqə hesabı bərabərləşdirib. İlk oyunda olduğu kimi, 1:1 hesabı qeydə alındığından, 30 dəqiqədən ibarət əlavə vaxt təyin edilib. “Xəzər-Lənkəran” fransalı hücumçusu Edmond N Tiamoa 79-cu dəqiqədə qırmızı vərəqə alaraq meydandan qovulduğundan, 41 dəqiqə azlıqda oynayıb və “Dinamo” əlavə vaxtın hər iki hissəsində fərqlənməyə müvəffəq olub. Mario Mancukiç 100, Yosip Todiç isə 116-cı dəqiqədə “Xəzər-Lənkəran”ın qapısına yol tapıb. Bununla da, “Xəzər-Lənkəran” iki il öncə UEFA kubokunda olduğu kimi, mübarizəni ilkin mərhələdə dayandırıb. İndiyədək ÇL-də çıxış edən klublarımızdan hələ ki, “Şəmkir” bu turnirin debütündə mərhələ adlamağı bacarıb.
Qeyd edək ki, 2001-ci ildə “Şəmkir”in baş məşqçisi kimi ÇL-də mərhələ adlayan Ağasəlim Mircavadov “Xəzər-Lənkəran”la bunu reallaşdıra bilməyib. /APA-Sport/