Döyüş növləri

Ana səhifə

Döyüş növləri

Azərbaycan avqustun 22-də Tacikistan yığması ilə qarşılaşacaq

31 iyul 2007 09:44 (UTC +04:00)

Futbol üzrə Azərbaycan milli komandası avqustun 22-də Tacikistanla beynəlxalq yoldaşlıq görüşü keçirəcək. Bu barədə “APA-Sport” agentliyinə məlumat verən AFFA-nın Milli Komandalar Departamentinin rəisi Bəhruz Əsgərovun sözlərinə görə, tacikistanlılar artıq rəsmi razılıq məktubu göndəriblər: “Tacikistan Futbol Federasiyası təklifimizə müsbət cavab verdi. Bu gün aldığımız faksda onlar bizi qəbul etməyə hazır olduqlarını bildiriblər”. Yoldaşlıq görüşü Tacikistanın paytaxtı Düşənbədə keçiriləcək. Bu, Azərbaycanla Tacikistan arasında ikinci qarşılaşma olacaq. İlk görüş 1993-cü il iyunun 6-da İranın paytaxtı Tehranda təşkil olunmuş beynəlxalq turnir çərçivəsində baş tutub. Yığmamız həmin matçda 2:0 hesabı ilə qalib gəlib.
Qeyd edək ki, AFFA yoldaşlıq oyunu keçirmək üçün Tacikistandan öncə 8 ölkəyə müraciət edib. Ancaq müxtəlif səbəblərdən Litva, Makedoniya, Çernoqoriya, Malta, İordaniya, Farer adaları, Lixtenşteyn və Lüksemburq AFFA-nın təklifinə müsbət cavab verməyib. /APA-Sport/