Döyüş növləri

Döyüş növləri

“Neftçi” klubunun UEFA kubokundakı rəqibi “Rid” Bakıya gəlib

01 avqust 2007 16:52 (UTC +04:00)

Azərbaycanı UEFA kubokunda təmsil edən “Neftçi” klubunun rəqibi Avstriyanın “Rid” komandası birinci təsnifat mərhələsinin cavab görüşünü keçirmək üçün bu gün Bakıya gəlib. “APA-Sport” agentliyinin məlumatına görə, avstriyalıları Bakıya gətirən təyyarənin Heydər Əliyev Beynəlxalq Hava Limanına saat 17:15-də enməsi gəzlənilsə də, onlar qeyri-müəyyən səbəbdən 40 dəqiqə yubanıblar. Havanın isti olmasından şikayətlənən qonaqlar UEFA kubokunun ikinci təsnifat mərhələsinə yüksələcəklərinə inandıqlarını bildiriblər. “Rid”in baş məşqçisi Helmut Kraft “APA-Sport” agentliyinə eksklüziv açıqlamasında cavab görüşü ərəfəsində şanslarının yüksək olduğunu deyib: “Qarşımıza UEFA kubokunun növbəti mərhələsinə yüksəlmək vəzifəsi qoymuşuq. Rəqibimiz hücum təşkilində yaxşı nəzərə çarpır, sürətli oyunçuları var. Üstəlik, Bakıda hava çox istidir. Çalışacağıq ki, bu amillər bizə maneçilik törətməsin. “Neftçi”yə uduzsaq, bu, bizim üçün faciəyə çevriləcək”. Komandanın türk əsilli yarımmüdafiəçisi Harun Ərbəy də Bakıya qələbə üçün gəldiklərini söyləyib: “İlk qarşılaşmada qələbə qazandığımız üçün növbəti mərhələyə çıxmaq şanslarımız çoxdur. Əleyhimizə olan yeganə amil 30 min nəfərlik tamaşaçı tutumuna malik stadionda oynamağımızdır. Bakıda da qələbə qazanaraq, ikinci təsnifat mərhələsinə yüksələcəyik”. “Rid”in prezidenti Yohan Villminqer isə sabahkı qarşılaşma ilə bağlı proqnoz verib: “Rəqibimizin Avstriyada nümayiş etdirdiyi oyun sürpriz oldu. Buna baxmayaraq, ilk matçda yaxşı nəticə əldə etmişik. Komandam “Neftçi” ilə cavab görüşündə qeyri-qənaətbəxş çıxış etsə belə, məşqçi korpusunda dəyişiklik etməyəcəyəm. Mənə elə gəlir ki, sabahkı oyun 0:0 hesabı ilə nəticələnəcək”. /APA-Sport/