Döyüş növləri

Döyüş növləri

Zaur Tağızadə: “Bütün azarkeşlərdən üzr istəyirəm”

03 avqust 2007 10:33 (UTC +04:00)

“Komandamızı mərhələ keçə bilməməsində mənim də günahım oldu. Qırmızı vərəqə almasaydım, bəlkə də nəticə başqa cür olardı. Bütün azarkeşlərdən üzr istəyirəm”. Bu sözləri “APA-Sport” agentliyinə açıqlamasında “Neftçi” klubunun kapitanı Zaur Tağızadə deyib. 28 yaşlı yarımmüdafiəçi UEFA kubokunun birinci təsnifat mərhələsində Avstriyanın “Rid” klubuna qarşı keçirilən cavab görüşünün 83-cü dəqiqəsində ona göstərilən qırmızı vərəqənin əsassız olduğunu bildirib: “Hakim mənə birinci sarı vərəqəni heç nədən göstərdi. Halbuki, həmin epizodda sırf topa oynamışdım. Amma hakim bunu qayda pozuntusu kimi qiymətləndirdi”. Z.Tağızadənin sözlərinə görə, meydandan qovulması komanda yoldaşlarının işini çətinləşdirib: “Futbol kollektiv idman növüdür. Heyətdə bir nəfər olmayanda, bu, açıq-aşkar hiss olunur. Təbii ki, mən qırmızı vərəqə alandan sonra komandamız çətin vəziyyətdə qaldı. Amma deməzdim ki, “Neftçi” məhz azlıqda qaldığı üçün qol buraxdı”. Futbolçu “Neftçi”nin mübarizəni erkən dayandırmasını bəxtsizliklə əlaqələndirib: “Sadəcə, bəxtimiz gətirmədi. Hər şeyi Avstriyada həll etməli idik. Lakin axırıncı dəqiqədə buraxdığımız qollara görə uduzduq. Bəxtsizlik amili cavab oyununda da sözünü dedi”. /APA-Sport/