Döyüş növləri

Döyüş növləri

“Orduspor” klubunun meneceri Dursun Karamustafa: “Ernani əsəblərini cilovlaya bilmədi”

07 avqust 2007 13:54 (UTC +04:00)

“Azərbaycandan futbolçu transfer etmək istəyirik”

Türkiyənin ikinci liqasının A kateqoriyasında mübarizə aparan “Orduspor” klubu Azərbaycandan futbolçu alacaq. Bu barədə “APA-Sport” agentliyinə komandanın meneceri Dursun Karamustafa məlumat verib. D.Karamustafa seleksiya məqsədi ilə Bakıya gələcəyini bildirib: “Dövrələrarası fasilədə, yəni qışda Bakıya səfərim planlaşdırılıb. Azərbaycandan futbolçu transfer etmək istəyirik. Bildiyimizə görə, Azərbaycanda gənc və perspektivli futbolçular var”. Türkiyəli menecerin sözlərinə görə, azərbaycanlı futbolçular ikinci liqada legioner sayılmadığı üçün bu amildən yararlanmaq fikrindədirlər: “Qaydalara əsasən, Türkiyənin ikinci liqasında forma geyən azərbaycanlılar yerli oyunçu statusu daşıyırlar. Bu amil bizim Azərbaycanda transfer çalışmaları həyata keçirməyimizə stimul verir”. D.Karamustafa az öncə “Orduspor”dan ayrılan Azərbaycan milli komandasının müdafiəçisi Ernani Pereyra haqqında da danışıb. Onun sözlərinə görə, braziliyalı futbolçu ehtiyatda qaldığından komanda ilə vidalaşıb: “Baş məşqçi Suat Kaya onu ehtiyatda saxladığı üçün Pereyra əsəblərini cilovlaya bilmədi. Beləliklə, o, klubdan getdi. Deyəsən, indi öz vətənindədir”. “Orduspor” rəsmisi E.Pereyranın məşqçi və ya texniki heyət üzvləri ilə dalaşmasını təsdiqləməyib.
Qeyd edək ki, ötən mövsüm Yevlaxın “Karvan” klubunun şərəfini qorumuş E.Pereyra iyulda “Orduspor”la bir illik müqavilə bağlamışdı. Amma braziliyalı futbolçu ilə müqavilə ikitərəfli qaydada pozulub. /APA-Sport/