Döyüş növləri

Döyüş növləri

Suat Kaya: “Ernani hazırlıq matçına çıxmaqdan imtina edərək, komandadan ayrıldı”

09 avqust 2007 11:29 (UTC +04:00)

“Ernani Pereyra burada özünü narahat hiss edirdi. O, özü komandamdan ayrılmaq istədi. Son hazırlıq matçına çıxmaqdan imtina etdi. Oynamaq istəməyən futbolçunu isə zorla saxlamaq fikrində deyildik”. Bu sözləri “APA-Sport” agentliyinə eksklüziv açıqlamasında futbol üzrə Türkiyənin ikinci liqasında mübarizə aparan “Orduspor” klubunun baş məşqçisi Suat Kaya deyib. Ernani Perayranın öz istəyi ilə komandadan ayrıldığını vurğulayan S.Kayanın sözlərinə görə, braziliyalı müdafiəçi ona bəslənən ümidləri doğrultmayıb: “Düzünü desəm, Ernaninin oyununu bəyənmədim. Bütün yoxlama görüşlərində ona şans verirdim. Amma ümidləri doğrultmadı. Bu barədə Pereyraya heç nə deməsəm də, o, özü məni anlayaraq, komandadan getdi”. Türkiyəli məşqçi E.Pereyranın komanda yoldaşları ilə mübahisə etməsi ilə bağlı yayılan məlumatları təkzib edib: “Ernaninin heç kimlə problemi yox idi. Sadəcə, komandada qalmaq istəmədi”. Vaxtilə “Qalatasaray” klubunun şərəfini qoruyan S.Kaya azərbaycanlı futbolçuları yaxşı tanımadığını söyləyib: “Ötən il “Akçaabat Sebatspor”a baxışa gələn Əliyev soyadlı oyunçu haqqında eşitmişdim. Azərbaycanda başqa futbolçuları tanımıram”. Bununla belə, S.Kaya gələcəkdə azərbaycanlı futbolçu alacaqlarını istisna etməyib: “Hazırda iş qrafikimiz çox gərgindir. Xarici səfərdən yenicə qayıtmışam. Komandada ciddi məşqlər gedir. Yəni, yeni transferlər haqqında düşünmürük. Gələcəkdə Azərbaycanda bəyəndiyimiz, münasib futbolçu olarsa, transfer edəcəyik”.
Qeyd edək ki, Azərbaycan yığmasının milliləşdirilmiş legioneri Ernani Pereyra ötən ay “Orduspor” ilə bir illik müqavilə bağlasa da, az öncə komandanı tərk edib. /APA-Sport/